Այսպես շարունակել չի կարելի. Քննչական կոմիտեն պարզում է Մհեր Եղիազարյանի մահվան հանգամանքները
Քննչական կոմիտեի Էրեբունի եւ Նուբարաշեն վարչական շրջանի քննչական բաժնում պարզում են «Նուբարաշեն» քրեակատարողական հիմնարկում մեղադրյալ Մհեր Եղիազարյանի մահվան հանգամանքները, Նշանակվել է դատաբժշկական փորձաքննություն։ Այս մասին հայտնում են Քննչական կոմիտեից:
Նշենք, որ 44 օր հացադուլի մեջ գտնվող, կալանավորված լրագրող Մհեր Եղիազարյանի մահվան հետ կապված հայտարարություն է տարածել նաև ԱԺ մարդու իրավունքների եւ հանրային հարցերի մշտական հանձնաժոովի նախագահ Նաիրա Զոհրաբյանը:
Նա մասնավորապես հայտնել է. ՙԱյսօր 44-օրյա հացադուլից հետո քրեակատարողական հիմնարկում մահացավ լրագրող Մհեր Եղիազարյանը: Որպես մարդու իրավունքների եւ հանրային հարցերի մշտական հանձնաժոովի նախագահ՝ պահանջում եմ պարզաբանում արդարադատության նախարարից եւ դատարանից ինչու՞ չբավարարվեց իմ, որպես պատգամավորի, անմիջապես Մհերի կալանավորումից հետո ներկայացրած միջնորդությունը փոխելու լրագրողի խափանման միջոցը: Եվ դեռ քանի՞ մարդ պետք է մահանա, որպեսզի հասկանանք, որ այսպես շարունակել չի կարելի: Ուղղակի չի կարելի՚:
ՙՍասնա Ծռեր՚ կուսակցության անդամ Վարուժան Ավետիսյանն էլ հայտարարել է. ՞Արդարադատության նախարարությունը, գոնե այս հերթական ողբերգությունից հետո, պարտավոր է.
1. ժամ առաջ առավելագույն ամբողջական տեղեկույթ տրամադրել հանրությանը Մհեր Եղիազարյանի մահվան հանգամանքների վերաբերյալ,
2. վերջ տալ իր ինքնագոհ ու ջայլամային վարքագծին եւ գերկարճ ժամկետում հանրային քննարկման ներկայացնել մարդու եւ նրա իրավունքների գերակայության վրա հիմնված փոփոխությունների ռազմավարության նախագիծ, որը կերաշխավորի քրեակատարողական համակարգի արդիականացումն ու մարդկայնացումը՚:
