Ազգային ժողովի նախկին պատգամավոր, ԵԿՄ վարչության նախկին նախագահ և խոշոր չափի յուրացման համար մեղադրվող Մանվել Գրիգորյանի մերձավորներին պատկանող ուղեբեռի փաթեթավորման բիզնեսը «Զվարթնոց» օդանավակայանի նախասրահից տեղափոխվել է դուրս ու «գրավել» օդանավակայան տանող ճանապարհը։ Այս մասին հայտնում է Aysor am-ը։ Հայաստանից մեկնող քաղաքացիների ուղեբեռի փաթեթավորումը նախկինում իրականացվել է միայն օդանավակայանի սրահում։ Այդ բիզնեսում մասնաբաժին են ունեցել Մանվել Գրիգորյանի մերձավորները։ Սակայն նախկին պատգամավորի վերաբերյալ խոշոր յուրացման փաստի առթիվ քրեական գործի (ստացել է «տուշոնկայի գործ» անվանումը՝ հեղ.) հարուցումից հետո «Զվարթնոց» օդանավակայանի ղեկավարությունը, լրատվամիջոցի տեղեկություններով, ջանքեր է թափել ազատվել Գրիգորյանին առնչվող բիզնեսից։ Արդյունքում այժմ օդանավակայանի նախասրահում տեղադրված ուղեբեռի փաթեթավորումն իրականացվում է այլ անձանց կողմից։