Սեդրակ Քոչարյանն Վանեցյանից հերքում է պահանջում

Այսօր տեղի է ունեցել Վանեցյանի դեմ առաջին դատական նիստը, որն էլ հետաձգվել է: Դատարանի որոշմամբ՝ հայցվոր կողմը պետք է եռօրյա ժամկետում ապացույց ներկայացնի, որ Սեդրակ Քոչարյանը «Կոնգրես» հյուրանոցի սեփականատերն է: Հիշեցնենք՝ ՀՀ Երկրորդ նախագահի որդին՝ Սեդրակ Քոչարյանը հայց է ներկայացրել ԱԱԾ պետ Արթուր Վանեցյանի դեմ՝ պահանջելով «փոխհատուցել զրպարտության դիմաց և հրապարակայնորեն հերքել» 2018 թվականի սեպտեմբերի 11-ին մամուլի ասուլիսի ժամանակ Վանեցյանի հայտնած այն միտքը, թե «Ռոբերտ Քոչարյանը 6 միլիոն դոլար կաշառք պահանջելով՝ դարձել է «Կոնգրես» հյուրանոցի բաժնետեր»: Հայցվոր կողմը հայցը պնդեց ամբողջությամբ, իսկ պատասխանող կողմն՝ առարկեց: Նշենք, որ ո՛չ Սեդրակ Քոչարյանը, ո՛չ էլ Արթուր Վանեցյանը նիստին ներկա չէին: Նախքան դատական նիստը սկսելը դատավորը կողմերին հարցրեց, թե արդյոք կո՞ղմ են, որ վեճը լուծվի հաշտությամբ: Սեդրակ Քոչարյանի շահերի ներկայացուցիչ Անի Ալավեդյանը հայտարարեց, թե հաշտությանը դեմ չեն, եթե պատասխանող կողմը հերքի տեղեկությունները, որոնք հրապարակվել են մամուլի ասուլիսի ժամանակ: Արթուր Վանեցյանի ներկայացուցիչ Վահագն Գրիգորյանն էլ ասաց, թե չեն կարող հաշտվել, քանի որ հայցվոր կողմը հաշտությունը տեսնում է միայն հայցի բավարարման ձևով: Վանեցյանի հնչեցրած արտահայտությունները չեն վերաբերում Սեդրակ Քոչարյանին։