Հունվարի 2-ին ծովահենների կողմից գերեվարված ծովագնացների թվում հայ կա

Հունվարի 2-ին Գվինեական ծոցում՝ Բենինի ափերի մոտ, ծովահենների կողմից գերեվարված MSC Mandу կոնտեյներային նավի անձնակազմի անդամների թվում հայ կա: Այս մասին հաղորդում է riafan.ru-ն: «Գերեվարվել են կապիտան Անդրեյ Իվանովը, ավագ օգնական Անդրեյ Սվիտինը, երրորդ օգնական Ալեքսանդր Սիմոնովը, բոցման Իգոր Տելեշինը, եռակցող Ռոման Իվանովը և խոհարար Անդրոնիկ Գրիգորյանը»,- նշվում է հրապարակման մեջ։ Հիշեցնենք, որ հունվարի 2-ի գիշերը զինված ծովահենները բարձրացել էին MSC Mandу նավի վրա, որը նավարկում է Պանամայի դրոշի ներքո: Նրանք թալանել են անձնակազմին ու անդամներից 6-ին գերի վերցրել: Թիմի մյուս անդամները՝ 20 հոգի, փրկվել են և գտնվում են անվտանգ վայրում: Հարձակումից հետո ծովահենները մտել են Նիգերիայի տարածքային ջրեր: