Երևանի ավագանին այսօրվա նիստում որոշեց վարչական շրջանների ղեկավարներին վերապահել աղբի գումարի հավաքագրման գործառույթը։ Քաղաքապետարանի իրավաբանական վարչության պետ Զավեն Առաքելյանը ավագանու նիստում ասաց, որ աղբահանության վճարը վճարողներին հաշվառելու, գումարը հաշվարկելու և գանձելու գործառույթն ամբողջությամբ վերապահվում է վարչական շրջանների ղեկավարներին, որոնք այդ գործառույթը պետք է իրականացնեն իրենց աշխատակազմերի միջոցով։ Ներկայումս աղբի գումարները գանձվում են համատիրությունների և մրցույթով ընտրված օպերատորի կողմից։ Ըստ Առաքելյանի` ակնկալվում է, որ այս որոշմամբ կբարձրանա այդ գումարների գանձման արդյունավետությունը։ Նա հիշեցրեց, որ ավագանու որոշմամբ վարչական շրջաններին է վերապահված հողի, գույքահարկի և կառուցապատման գումարների գանձման գործառույթը, աղբահանության գումարները պետք է գանձվեն նույն սկզբունքով։ Այս պահին, ըստ Առաքելյանի, վարչական շրջանների ղեկավարների աշխատակազմերն ունեն այդ ներուժը` կազմակերպելու աշխատանքները` բացառելով կոռուպցիոն ռիսկերը։