Փաշինյանը՝ սկանդալային նշանակման մասին

Ապրիլյան պատերազմի մասին կարդացել եմ տասնյակ, եթե ոչ հարյուրավոր էջերով գաղտնի փաստաթղթեր, որոնց մեջ չկա մի փաստ, որ հետախուզական տվյալները չեն եղել: Այս մասին լրագրողների հետ զրույցում ասաց ՀՀ վարչապետի պատոնակատար Նիկոլ Փաշինյանը՝ անդրադառնալով իր խորհրդականի՝ Արշակ Կարապետյանի նշանակման հարցին: Փաշինյանի խոսքով՝ նրանք, ովքեր պնդում են, որ ապրիլյան պատերազմը եղել Արշակ Կարապետյանի մեղքով, ուրեմն նշում են, որ նրանից վերև գտնվող պատասխանատուները մեղքի իրենց բաժինը չեն ունեցել: Նա նշեց, որ ապրիլյան պատերազմից առաջ կուտակումներ են եղել, ինչի մասին բոլորն էլ տեղյակ են եղել: Վարչապետի պաշտոնակատարը նշեց, որ այս ընթացքում բազմաթիվ բանավոր և գրավոր տեղեկություններ են ստացվում, որոնք դեռ ստուգման կարիք ունեն: «Մեր բոլոր գործողություններն ուղղված են և ուղղված են լինելու ճշմարտությունները բացահայտելուն»,- ասաց Փաշինյանը: Հիշեցնենք, որ դեկտեմբերի 17-ին վարչապետի հրամանով վարչապետի խորհրդական է նշանակվել ՀՀ ԶՈՒ հետախուզության վարչության նախկին պետ Արշակ Կարապետյանը: Համացանցում մի շարք օգտատերեր նշում են, որ Արշակ Կարապետյանը ապրիլյան պատերազմի մասին չի զեկուցել ԶՈՒ ղեկավարությանը: