Տուն-տեղն էլ ծախենք, տարեք, կերեք, կշտացեք․ ավտովաճառողների ակցիան ՊԵԿ-ի դիմաց

Մի խումբ ավտովաճառողներ այսօր բողոքի ակցիա են անցկացրել Պետական եկամուտների կոմիտեի հարկ վճարողների սպասարկման կենտրոնի դիմաց։ News.am–ի հետ զրույցում ակցիայի մասնակիցներից Մերուժան Բադալյանը նշեց, որ ՊԵԿ–ը փորձում է իրենց կրկնակի հարկել։ «Մեզ հարկային տեսչությունից ասել էին, որ տարվա մեջ մի անգամ արդեն մեքենա վաճառած ես լինում, երկրորդը կարող ես ձևակերպել որպես նվիրատվություն, որ չընկնես հարկերի տակ։ Հարցրել ենք ու այդպես էլ արել ենք։ Հիմա մենք նամակներ ենք ստացել, որ երկրորդ մեքենան, որը նվիրատվություն ենք արել, դրա շուկայական արժեքի 20 տոկոսը տանք իրենց։ Ինչի՞ համար, եթե մենք նվիրել ենք, ոչ թե վաճառել։ Երկրորդ, ինչո՞ւ են մեքենայի շուկայական արժեքից գանձում։ Բացի դրանից, մեքենա կա, որը լիքը խնդիրներ ունի, մենք դա վաճառում ենք շուկայականից մի քանի անգամ ցածր գնով, հիմա մենք ո՞նց տանք դրա 20 տոկոսը»,– ասաց նա։ Ակցիայի մասնակիցների խոսքով՝ ՊԵԿ–ում նախ իրենց պարզաբանել են, որ գանձելու որոշումը կայացվել է այս տարվա հունվարի 1–ից, ապա մտափոխվել են, եւ հունիսի 1–ից է որոշումն ուժի մեջ մտել. «Հիմա մերոնցից մեկն իր գործարքն արել է ապրիլին, բայց իրեն էլ է նամակ եկել։ Ինչ են ուզում մեզնից, տուն-տեղն էլ ծախենք, տարեք, կերեք, կշտացեք։ Հիմա մարդ կա, մեքենան ծախել ա, որ հիվանդանոցի փող տա, ո՞նց էդ 20 տոկոսը վճարի»։ Ավտովաճառողները պատրաստվում են բողոքի ակցիա անել նաեւ կառավարության շենքի դիմաց։