Սև ծովում ԱԹՍ-ն հարվածել է թուրքական նավին

Թուրքական Akkon Lines ընկերության կողմից շահագործվող M/V RMS TEAM նավը Սև ծովում ենթարկվել է անօդաչու թռչող սարքի հարձակման, ինչի հետևանքով նավամատույցում կրակ է բռնկվել․ անձնակազմի 11 անդամի հաջողվել է փրկվել, իսկ ևս մեկ մարդ համարվում է անհետ կորած, հայտնում է lojiport.com տրանսպորտային պորտալը։

«M/V RMS TEAM նավը Սև ծովում անօդաչու թռչող սարքի հարձակման է ենթարկվել։ Նավում հրդեհ է բռնկվել, անձնակազմի 11 անդամ փրկվել է, մեկ նավաստու որոնումները շարունակվում են», — ասվում է հաղորդագրության մեջ։

Նշվում է, որ տագնապի ազդանշանը ստանալուց հետո մոտակայքում գտնվող նավը շտապել է օգնության և փրկել անձնակազմի 11 անդամին։

Եվս մեկ նավաստի դեռևս անհետ կորած է համարվում։ Պատահարի վերաբերյալ տեղեկատվությունը փոխանցվել է համապատասխան որոնողափրկարարական ծառայություններին։

Lojiport.com-ի փոխանցմամբ՝ անձնակազմի էվակուացիայից հետո կրակը բռնկվել է նավի բնակելի հատվածներում և մեքենայական բաժանմունքում։ Հետագայում հրդեհը տարածվել է նաև կոնտեյներների տեղադրման գոտում։

«Ընկերությունը հայտնել է, որ, ելնելով առկա տեղեկատվությունից, նավը և նրանում գտնվող բեռը կարող են համարվել ամբողջությամբ վնասված», - գրում է հրատարակությունը։