«Սարդ-մարդ»-ի նոր ֆիլմը պատմության մեջ երկրորդ ամենահաջող եկամուտն է ունեցել

«Սարդ-մարդ. բոլորովին նոր օր» ֆիլմը տպավորիչ մեկնարկ է գրանցել կինովարձույթում՝ Հյուսիսային Ամերիկայում հավաքելով 355 մլն դոլար, իսկ ամբողջ աշխարհում՝ 927 մլն դոլար։ CNN-ի փոխանցմամբ՝ սա կինովարձույթի պատմության մեջ երկրորդ ամենախոշոր դեբյուտն է։

Վերլուծաբանների տվյալներով՝ ֆիլմը զիջում է միայն 2019 թվականին թողարկված «Վրիժառուները. Վերջնախաղ» ֆիլմին, որը ԱՄՆ-ում և Կանադայում բացման ընթացքում հավաքել էր 357 մլն դոլար։ «Սարդ-մարդ. բոլորովին նոր օր»-ը մեծ էկրան է վերադարձել ֆրանշիզայի նախորդ՝ «Սարդ-մարդ. Տուն չկա» ֆիլմից գրեթե հինգ տարի անց, որի բացման եկամուտը Հյուսիսային Ամերիկայում կազմել էր 260 մլն դոլար։

Նոր ֆիլմը նաև բարձր գնահատականներ է ստացել հանդիսատեսից:

Միևնույն ժամանակ, հաջող ցուցադրություններ է շարունակում նաև Universal Pictures-ի «Ոդիսականը»։ Ֆիլմը բացման շաբաթավերջին վաստակել էր 124,5 մլն դոլար, իսկ երկրորդ շաբաթավերջին ավելացրել է ևս 51 մլն դոլար՝ համաշխարհային եկամուտը հասցնելով 911,4 մլն դոլարի։

Շաբաթավերջի կինովարձույթի լավագույն հնգյակում ընդգրկվել են նաև Disney-ի «Խաղալիքների պատմություն 5»-ը՝ 6,3 մլն դոլար, Universal-ի «Մինիոններ և հրեշներ»-ը՝ 5,8 մլն դոլար, «Մոանա» ֆիլմի խաղարկային տարբերակը՝ 5,3 մլն դոլար և «Հեյդսթաուն. Մյուզիքլ»-ի խաղարկային տարբերակը՝ 2,1 մլն դոլար։

Վերլուծաբանների գնահատմամբ՝ օգոստոսի հաջող մեկնարկը կարող է օգնել, որ ամառային կինոսեզոնի ընդհանուր եկամուտը հասնի 4 մլրդ դոլարի։ 2026 թվականի ընդհանուր կինովարձույթի հասույթը, ըստ կանխատեսումների, կարող է մոտենալ 10 մլրդ դոլարին։ Տարվա սկզբից կինոթատրոնների եկամուտն արդեն կազմել է 6,19 մլրդ դոլար, ինչը գրեթե 15%-ով գերազանցում է 2025 թվականի նույն ժամանակահատվածի ցուցանիշը։