Իրանը սպառնում է ընդլայնել հարվածների աշխարհագրությունը, եթե ԱՄՆ-ն շարունակի գործողությունները

Իրանի զինված ուժերի ներկայացուցիչ, բրիգադի գեներալ Մոհամմադ Աքրամինիան հայտարարել է, որ եթե ԱՄՆ-ն շարունակի հարվածներ հասցնել Իրանի տարածքին և նրա դաշնակիցներին, Թեհրանը պատասխան հարվածները կտարածի նոր ուղղություններով։ Այդ մասին նա ասել է պետական հեռուստատեսության եթերում՝ չհստակեցնելով, թե որ տարածքների կամ օբյեկտների մասին է խոսքը։

Հայտարարությունը հնչել է այն ֆոնին, երբ ԱՄՆ-ն ակտիվացրել է ավիահարվածները ինչպես Իրանի տարածքում, այնպես էլ Իրաքում գործող իրանամետ խմբավորումների դիրքերի նկատմամբ։ Վաշինգտոնը դրանք ներկայացնում է որպես պատասխան իր ռազմաբազաների դեմ իրականացված հարձակումներին։ Իրանը հերքում է այդ խմբավորումների նկատմամբ անմիջական վերահսկողությունը, սակայն ընդունում է, որ աջակցում է նրանց գաղափարապես և իրեն իրավունք է վերապահում պատասխանել ասիմետրիկ միջոցներով։

Թեև Իրանը չի բացահայտել հնարավոր պատասխան գործողությունների բնույթը, փորձագետների կարծիքով «նոր ուղղությունները» կարող են ներառել Կարմիր ծովի տարածաշրջանը։ Նրանց գնահատմամբ՝ Թեհրանը կարող է սեփական ուժերով կամ տարածաշրջանային դաշնակիցների, այդ թվում՝ հութիների միջոցով, հարվածներ հասցնել ռազմական և առևտրային նավերին, ինչպես նաև նավահանգստային ենթակառուցվածքներին։ Հատուկ ուշադրություն է դարձվում Սաուդյան Արաբիայի Յանբու և Ջիդդա նավահանգիստներից դեպի Իսրայել, Եվրոպա և ԱՄՆ շարժվող տանկերներին ու բեռնատար նավերին։

Վերլուծաբանները նշում են, որ եթե հակամարտությունը տարածվի նաև Կարմիր ծով, դա կարող է խաթարել համաշխարհային մատակարարման շղթաները և նպաստել էներգակիրների գների աճին, քանի որ այդ տարածաշրջանով է անցնում նավթի համաշխարհային առևտրի զգալի մասը։ Միևնույն ժամանակ Աքրամինիայի հայտարարությունը դիտարկվում է նաև որպես զսպման ազդակ․ Իրանը ցույց է տալիս, որ պատրաստ է սրացման, սակայն միտումնավոր չի հրապարակում մանրամասներ՝ ԱՄՆ-ին կանխարգելիչ գործողությունների լրացուցիչ առիթ չտալու համար։