Ազովի ծովում նոր ճակատ․ Ռուսաստանը մեղադրում է Ուկրաինային, Կիևը հայտնում է տասնյակ նավերի խոցման մասին

Ռուսաստանը Ուկրաինային մեղադրել է ահաբեկչության մեջ՝ Ազովի ծովում նավերի դեմ իրականացվող հարձակումների ֆոնին, մինչդեռ Կիևը հայտարարել է, որ վերջին ինը օրում հարվածել է 116 ռուսական նավի։

Ուկրաինայի անօդաչու համակարգերի ուժերի հրամանատար Ռոբերտ Բրովդին հայտնել է, որ միայն վերջին գիշերվա ընթացքում հարվածներ են հասցվել 11 ռուսական նավի՝ հինգ նավթատարի, հինգ բեռնանավի և մեկ քարշակի։ Նրա խոսքով՝ վերջին ինը օրում խոցված նավերի ընդհանուր թիվը հասել է 116-ի։

Reuters-ի աղբյուրների փոխանցմամբ՝ հուլիսի 13-14-ին հարվածների հետևանքով վնասվել և հրդեհվել են նաև մի քանի հացահատիկ տեղափոխող նավեր, սակայն ուկրաինական կողմը չի հաստատել, որ թիրախում եղել են քաղաքացիական բեռներ։

Ռուսաստանի արտգործնախարար Սերգեյ Լավրովը հայտարարել է, որ Ուկրաինայի գործողությունները «դուրս են գալիս անգամ ծովահենության սահմաններից»։

«Սա ահաբեկչություն է՝ մաքուր և պարզ», - ասել է Լավրովը։

Իր հերթին ուկրաինական ռազմական աղբյուրը Reuters-ին հայտնել է, որ Ուկրաինայի զինված ուժերը հարվածում են միայն ռազմական նշանակության կամ Ռուսաստանի ռազմական ներուժն ուժեղացնող օբյեկտներին։

«Քաղաքացիական բեռները մեր թիրախը չեն։ Ռուսաստանը քաղաքացիական նավերի վրա հարձակումների մասին հայտարարություններով փորձում է արդարացնել ուկրաինական քաղաքացիական ենթակառուցվածքների նկատմամբ իր հարվածները», - նշել է աղբյուրը։

Reuters-ի տեղեկություններով՝ հուլիսի 10-ից Ազովի ծովում նավագնացությունը զգալիորեն սահմանափակվել է։ Առևտրային նավերը չեն կարողանում մուտք գործել կամ դուրս գալ Ազովի ծովից Կերչի նեղուցով և Ազով-Դոն ջրանցքով։

Ազովի ծովը ռազմավարական նշանակություն ունի Ռուսաստանի համար, քանի որ այնտեղով իրականացվում է երկրի հացահատիկի արտահանման մոտ մեկ քառորդը։ Ռուսաստանի գյուղատնտեսության նախարարությունը հայտարարել է, որ անհրաժեշտության դեպքում արտահանումը կվերաուղղվի դեպի Սև և Բալթիկ ծովերի նավահանգիստներ՝ ապահովելով արտահանման պայմանագրերի կատարումը։

Ռուսաստանում արդեն սկսվել է նոր բերքի հավաքը, և իշխանությունները հայտարարում են, որ աշխատում են հնարավորինս նվազեցնել ժամանակավոր լոգիստիկ խնդիրների ազդեցությունը գյուղատնտեսական արտադրանքի արտահանման վրա։