ՏԵՍԱՆՅՈՒԹ. Ճարներս կորցրել ենք. «Մուլտի սթոուն»-ի աշխատակիցները պահանջում են բացել կապարակնքված աշխատավայրը

«Չգիտենք ինչ անենք, ճարներս կորցրել ենք, եթե մեզ երկիրը չի ուզում աջակցի, ուրեմն մենք էլ ամեն ինչ պիտի անենք, որ գոնե կարողանանք մեր ընտանիքները պահենք», - Հայաստանում «Մուլտի Սթոուն» քարամշակման գործարանի աշխատակիցները հուլիսի 15-ին կրկին դուրս են եկել փողոցային բողոքի ակցիայի՝ պահանջելով հանել պետական կնիքները և վերսկսել ձեռնարկության աշխատանքը։ Հավաքվածները հայտարարել են, որ հարկադիր պարապուրդի պատճառով զրկվել են իրենց եկամտի միակ աղբյուրից և ընտանիքները պահելու հնարավորությունից։

Ակցիայի մասնակիցներն ընդգծել են, որ իրենց գլխավոր և միակ պահանջը աշխատանքի օրինական իրավունքը վերադարձնելն է։ Մարդիկ վրդովված են, որ հարյուրավոր ընտանիքներին աշխատատեղերով ապահովող հաջողակ արտադրությունը արգելափակվել է վերահսկող մարմինների որոշմամբ։

Հիշեցնենք, որ «Բարգավաճ Հայաստան» կուսակցության առաջնորդ Գագիկ Ծառուկյանի ձեռնարկություններում և առանձնատանը լայնածավալ խուզարկությունները սկսվել էին հուլիսի 6-ին, որից հետո նա ձերբակալվել ու կալանավորվել էր 2022-2024 թվականներին կատարված խարդախության և փողերի լվացման գործով։