Թուրքիան ցանկանում է ազատվել ռուսական Ս-400-ներից. Bloomberg

Անկարան դիմել է Մոսկվային՝ խնդրելով թույլտվություն տալ Ռուսաստանից ձեռք բերված Ս-400 զենիթահրթիռային համակարգերը մեկ այլ պետության փոխանցելու համար։ Ինչպես հայտնում է Bloomberg գործակալությունը, այս քայլն ուղղված է ամերիկյան հինգերորդ սերնդի F-35 կործանիչների գնման ճանապարհին առկա հիմնական արգելքը վերացնելուն։ 

Թուրք պաշտոնյաները նշում են, որ վերջին շաբաթների ընթացքում այս թեմայով բանակցություններ են ընթացել։ Նախկինում Թուրքիայի նախագահ Ռեջեփ Թայիփ Էրդողանը հանդես էր եկել Ս-400 համակարգերը Ռուսաստանին վերադարձնելու առաջարկով, սակայն այդ գործընթացը զարգացում չի ունեցել։ 

Անկարայի ակնկալիքով՝ ռուսական ՀՕՊ համակարգերի փոխանցումը երրորդ երկրին հնարավորություն կտա կարգավորել ԱՄՆ-ի հետ առկա տարաձայնությունները և վերսկսել մասնակցությունը F-35 ծրագրին, որից Թուրքիան դուրս էր մնացել հենց Ս-400-ների գնման պատճառով։ Մոսկվան ու Անկարան այս տեղեկատվության վերաբերյալ դեռևս պաշտոնական մեկնաբանություններ չեն տվել։