ՏԵՍԱՆՅՈՒԹ. Լիազորությունների գերազանցում չի եղել․ Քոչարյանի պաշտպան

Նախագահի պաշտպանական կողմը դատարանում հայտարարել է, որ մեղադրանքը հիմնված է նախագահի լիազորությունների սխալ մեկնաբանության վրա և նույնիսկ մեղադրանքում նկարագրված փաստերը ճիշտ լինելու դեպքում դրանք չեն կարող դիտարկվել որպես լիազորությունների գերազանցում։

Պաշտպանի խոսքով՝ Սահմանադրության 49-րդ հոդվածը Հանրապետության նախագահին վերապահում էր երկրի անվտանգության ապահովման, ինչպես նաև զինված ուժերի քաղաքական չեզոքության պահպանման ուղղությամբ գործողություններ իրականացնելու իրավասություն։

«Նույնիսկ եթե տեսականորեն ընդունենք մեղադրանքում նկարագրված փաստերը, դրանք չեն կարող համարվել լիազորությունների գերազանցում, քանի որ վերաբերում են նախագահի սահմանադրական դերակատարությանը»,- նշել է պաշտպանը։

Նրա խոսքով՝ 2015 թվականի սահմանադրական փոփոխություններից հետո նախագահի մի շարք լիազորություններ փոխվել են, սակայն դա չի նշանակում, որ նախագահը զրկված էր իր կարգավիճակից բխող գործողություններ կատարելու իրավունքից, հատկապես երկրի անվտանգության հարցերում։

Նա նաև անդրադարձել է այն ժամանակվա իրադարձություններին՝ նշելով, որ առկա էին տեղեկություններ, ըստ որոնց՝ «Երկրապահ» կամավորական միության ղեկավարությունը և պաշտպանության նախարարի երկու տեղակալները փորձել են զինված ուժերին ներգրավել քաղաքական գործընթացներում։

«Եթե նման իրավիճակում նախագահը հանդիպել է զինված ուժերի ներկայացուցիչների հետ կամ քննարկել այդ հարցերը, ապա դա ինքնին գտնվում է նրա սահմանադրական լիազորությունների շրջանակում։ Սա չի նշանակում, որ ընդունում ենք մեղադրանքի փաստական պնդումները կամ համաձայն ենք, թե որևէ հանձնարարական է տրվել, սակայն նման գործողությունը չի կարող որակվել որպես լիազորությունների գերազանցում»,- եզրափակել է նա։