ՏԵՍԱՆՅՈՒԹ. Օձերի ակտիվացման շրջանն է․ փրկարարները հորդորում են չմոտենալ և զանգահարել 112

Ամառվա շոգ օրերին ակտիվանում են նաև օձերը․ տաք եղանակը, բաց տարածքներում հանգիստը և գյուղատնտեսական աշխատանքների ակտիվացումը մեծացնում են մարդկանց և սողունների հանդիպման հավանականությունը։

ՆԳՆ Փրկարար ծառայության Փրկարարական ուժերի վարչության ՀՆՓԱԻԿ 4-րդ փրկարարական ջոկատի հրամանատարի տեղակալ Ռոման Խաչատրյանի խոսքով՝ օձերը հիմնականում բնակելի տարածքներ են գալիս ոչ թե բնակվելու, այլ որսի նպատակով։

«Օձերը շատ խելացի սողուններ են, եթե օձերին չվնասենք, նրանք չեն հարձակվի մարդու վրա»,- նշել է նա։

Մասնագետը խորհուրդ է տալիս օձ տեսնելիս պահպանել առնվազն 2-2,5 մետր հեռավորություն, չխուճապի մատնվել և մնալ անշարժ։

Եթե օձը հայտնվել է բնակարանում կամ բակում, խորհուրդ չի տրվում փորձել ինքնուրույն բռնել կամ հեռացնել այն։ Անհրաժեշտ է զանգահարել 112, և փրկարարները կտեղափոխեն օձին անվտանգ վայր։

Օձի խայթոցի դեպքում անհրաժեշտ է շատ հեղուկ օգտագործել և հնարավորինս արագ դիմել բուժօգնության։

Փրկարար ծառայությունը ևս մեկ անգամ հորդորում է ամառային շրջանում լինել զգոն և հիշեցնում, որ օձերը բնության մեջ կարևոր դեր ունեն էկոլոգիական հավասարակշռության պահպանման գործում։

Մանրամասները՝ տեսանյութում։