Հուսով ենք՝ Հայաստանը կունենա իր նավթազտարանը. Իրանի դեսպան

Հայաստանում Իրանի դեսպան Խալիլ Շիրղոլամին հայտարարել է, որ հույս ունի՝ Հայաստանը կունենա սեփական նավթազտարան, որտեղ Իրանի հում նավթից կարտադրվեն անհրաժեշտ նավթամթերքներ։

Դեսպանը ասուլիսի ժամանակ նշել է, որ այդ արտադրանքը կարող է մատակարարվել ինչպես Հայաստանի ներքին շուկային, այնպես էլ արտահանվել այլ շուկաներ։

«Հուսով ենք, որ Հայաստանը կունենա իր նավթազտարանը, որտեղ Իրանի հում նավթից կստանան անհրաժեշտ նավթամթերքը թե՛ Հայաստանին, թե՛ Հայաստանից դուրս շուկաներին մատակարարելու համար»,- ասել է Շիրղոլամին։

Նա նաև անդրադարձել է Հայաստանի և Իրանի միջև տնտեսական համագործակցության հնարավորություններին։

Դեսպանի խոսքով՝ եթե ամրապնդվի Իրանի «Արաս» առևտրատնտեսական գոտու և Մեղրու ազատ տնտեսական գոտու միջև կապը, դա կարող է նոր հնարավորություններ ստեղծել երկու երկրների համար։

Շիրղոլամին նշել է նաև տրանզիտային նախագծերի կարևորությունը՝ ընդգծելով, որ Ջուղայից մինչև Սև ծով երկաթգծի բացումը կարող է Հայաստանի համար նոր տնտեսական եկամուտներ ստեղծել։

Նրա խոսքով՝ Հայաստանի և Իրանի հարաբերություններում դեռևս կա չիրացված մեծ ներուժ, որը կարող է նոր հեռանկարներ բացել տարբեր ոլորտներում։