Առյուծի անկման դեպքով առանձին քրեական վարույթ չի նախաձեռնվի․ ՔԿ

Գագիկ Ծառուկյանի առանձնատան տարածքից Երևանի կենդանաբանական այգի տեղափոխված առյուծներից մեկի անկման դեպքի առթիվ առանձին քրեական վարույթ չի նախաձեռնվի։ Այս մասին NEWS.am-ին հայտնեցին Քննչական կոմիտեից։

ՔԿ-ի փոխանցմամբ՝ էգ առյուծի՝ քնեցումից չարթնանալու հանգամանքները կքննարկվեն այն նույն քրեական վարույթի շրջանակում, որով կենդանին ճանաչվել է որպես իրեղեն ապացույց։

Հիշեցնենք՝ հուլիսի 6-ին Գագիկ Ծառուկյանի առանձնատանը խուզարկություններ էին իրականացվել, որին հաջորդել էր նրա ձերբակալությունը, ապա կալանավորումը։ Գործողություններն իրականացվել են Քննչական կոմիտեում քննվող՝ փողերի լվացման վերաբերյալ քրեական վարույթների շրջանակում։

Բացի այդ, ՔԿ-ում նախաձեռնվել էր ևս մեկ քրեական վարույթ՝ վայրի կենդանի կամ թռչուն ապօրինի որսալու դեպքի առթիվ։ Այդ վարույթի շրջանակում Ծառուկյանին պատկանող առանձնատնից առգրավվել էին տարբեր կենդանիների և թռչունների 190 խրտվիլակ, ինչպես նաև 3 առյուծ և 1 վագր։

Քննչական կոմիտեի տվյալներով՝ կենդանիներն ու թռչունները ճանաչվել էին որպես իրեղեն ապացույց և տեղափոխվել Երևանի կենդանաբանական այգի։

ՔԿ-ի հաղորդագրության համաձայն՝ ապօրինի որսի հետևանքով շրջակա միջավայրին պատճառվել է շուրջ 30 մլն դրամի վնաս։

Միաժամանակ, իրեղեն ապացույց ճանաչված ազնվացեղ սպիտակ առյուծներից մեկը, Երևանի կենդանաբանական այգի տեղափոխվելուց հետո, քնեցումից չի արթնացել և անկել է։