Անկարայում ՆԱՏՕ-ի գագաթնաժողովում առնվազն 50 միլիարդ դոլարի պայմանագրեր են ստորագրվել

Թուրքիայի մայրաքաղաք Անկարայում ընթացող ՆԱՏՕ-ի գագաթնաժողովի շրջանակում ստորագրվել են առնվազն 50 միլիարդ դոլարի պայմանագրեր։ Այդ մասին հայտնում է Euractiv-ը՝ հղում անելով դաշինքի ներկայացուցչին։

Պայմանագրերի հիմնական մասը վերաբերում է հակաօդային պաշտպանության համակարգերի, անօդաչու թռչող սարքերի (ԱԹՍ) ձեռքբերմանը, ինչպես նաև ռազմական տեխնիկայի և սպառազինության համատեղ արտադրության ծրագրերին։

ՆԱՏՕ-ի գլխավոր քարտուղար Մարկ Ռյուտեն հայտարարել է, որ դաշինքի 20 անդամ պետություն միացել է Drone Edge նախաձեռնությանը։ Ծրագրի շրջանակում առաջիկա հինգ տարիների ընթացքում նախատեսվում է 40 միլիարդ դոլար ներդնել անօդաչու թռչող սարքերի արտադրության, ինչպես նաև դրանց դեմ պայքարի միջոցների մշակման ուղղությամբ։

ՆԱՏՕ-ի գագաթնաժողովը Անկարայում անցկացվում է հուլիսի 7-8-ը։ Դրան մասնակցում են Հյուսիսատլանտյան դաշինքի բոլոր 32 անդամ երկրների ղեկավարները։ Հանդիպման հիմնական թեմաներն են ՆԱՏՕ-ի երկրների միջև պաշտպանական համագործակցության խորացումն ու դաշինքի տեխնոլոգիական զարգացման մեջ ներդրումների ընդլայնումը։