ՏԵՍԱՆՅՈՒԹ. Գագիկ Ծառուկյանը նախահարձակ չի եղել, միայն արձագանքել է իրեն ուղղված սպառնալիքներին. Իվետա Տոնոյան

ԲՀԿ խոսնակ Իվետա Տոնոյանն անդրադարձել է Գագիկ Ծառուկյանի շուրջ ընթացող զարգացումներին՝ հայտարարելով, որ դրանք հաջորդել են նախընտրական շրջանում հնչած սպառնալիքներին։

Նրա խոսքով՝ նախընտրական քարոզարշավի ընթացքում ակտիվացել են Գագիկ Ծառուկյանի հասցեին հնչող ֆիզիկական, տնտեսական և քաղաքական հաշվեհարդարի սպառնալիքները։

«Գագիկ Ծառուկյանը երբևէ այս գործընթացում նախահարձակ չի եղել։ Նա միայն արձագանքել է իրեն ուղղված սպառնալիքներին ու վիրավորանքներին»,- նշել է Տոնոյանը։

ԲՀԿ խոսնակի խոսքով՝ Ծառուկյանը բազմիցս հայտարարել է, որ չի պատրաստվում իջնել քաղաքական հակառակորդների մակարդակին, սակայն, նրա գնահատմամբ, նույնիսկ այդ հայտարարություններից հետո իշխանության ներկայացուցիչների կողմից շարունակվել է ոչ պատշաճ և ոչ քաղաքական հռետորաբանությունը։

«Գագիկ Ծառուկյանը հարյուրավոր անգամներ ասել է, որ իր «կլասը» չի գցելու, սակայն այդ ամենից հետո էլ շարունակվել են ոչ քաղաքական և վիրավորական արտահայտությունները, որոնցից որոշներին նա ստիպված է եղել պատասխանել նույն տերմինաբանությամբ»,- ասել է Իվետա Տոնոյանը։