ԱՄՆ-ում սաստիկ շոգը մարդկանց կյանքեր է խլել

ԱՄՆ-ում հաստատված ռեկորդային շոգը, նախնական տվյալներով, կարող էր դառնալ 25 մարդու մահվան պատճառ՝ հարավային նահանգներից մինչև Միջին Արևմուտք և արևելյան ափ, հայտնում է NBC News-ը։

Ծայրահեղ բարձր ջերմաստիճանները նաև ազդել են Անկախության օրվան նվիրված տոնական միջոցառումների անցկացման վրա։

Ազգային օդերևութաբանական ծառայության տվյալներով, երկրի արևելյան երկու երրորդում մոտ 156 միլիոն մարդու համար հայտարարվել էին շոգի վերաբերյալ նախազգուշացումներ։ ԱՄՆ տարածքի վրա ձևավորվել էր կայուն «ջերմային գմբեթ», որի պայմաններում տաք օդը իջնում է ներքև և լրացուցիչ տաքանում, ինչը մի շարք շրջաններում, ներառյալ Վաշինգտոնը, Նորֆոլքը և Ռալին, հանգեցրել էր 38–40°C-ից բարձր ջերմաստիճանների։ Հատկապես բարդ էր իրավիճակը Վաշինգտոնում, որտեղ Ազգային մոլում անցկացվում էին “Salute to America 250” միջոցառումները՝ նվիրված ԱՄՆ անկախության 250-ամյակին։ Այնտեղ փրկարարներն ու Ազգային գվարդիայի զինծառայողները օգնություն էին ցուցաբերում տոնի մասնակիցներին, որոնց մոտ նկատվում էին ջերմային հարվածի և գերտաքացման ախտանիշներ։ 

Հաղորդվում էր տուժածների մասին նաև հենց հանդիսատեսի շրջանում, որոնք բաց արևի տակ էին գտնվում, երբ նստատեղերի ջերմաստիճանը հասնում էր մինչև 71°C-ի։ Զուգահեռաբար եղանակային պայմանները վատթարանում էին ամպրոպային ճակատի պատճառով։ Իշխանությունները ժամանակավորապես խորհուրդ էին տվել այցելուներին պատսպարվել, ինչը հանգեցրել էր միջոցառումների մի մասի ուշացմանը։ ԱՄՆ նախագահ Դոնալդ Թրամփի տոնական ելույթը տեղի ունեցավ մոտ չորս ժամ ուշացումով, որից հետո տարածաշրջանում անձրև սկսվեց հրավառության ժամանակ։ Ամբողջ երկրում ուժեղ շոգն ուղեկցվում էր փոթորիկներով և էլեկտրամատակարարման խափանումներով։ 

Ավելի քան 72 միլիոն մարդ գտնվում էր ամպրոպների վերաբերյալ նախազգուշացումների ներքո, իսկ ավելի քան 1,3 միլիոն տնային տնտեսություն մնացել էր առանց էլեկտրականության՝ էլեկտրահաղորդման գծերի վնասման պատճառով։ Որոշ նահանգներում գրանցվել էին մինչև 105 կմ/ժ արագությամբ քամու պոռթկումներ և խոշոր կարկուտ։ Մի քանի նահանգների բժշկական ծառայություններ հաստատել են գերտաքացման հետ կապված մահվան դեպքեր։ Նյու Ջերսիում շոգից մահացածների թիվն աճել է մինչև 22, ինչպես նաև մահեր են գրանցվել Իլինոյսում և Միսիսիպիում։ Զոհերի մեծ մասը հայտնաբերվել էր օդորակման բացակայությամբ տարածքներում կամ սառեցման սահմանափակ հասանելիության պայմաններում։ 

Օդերևութաբանները զգուշացնում են, որ առաջիկա օրերին շոգը կսկսի տեղաշարժվել, սակայն վտանգավոր բարձր խոնավությունն ու գիշերային ջերմաստիճանները կշարունակեն սպառնալիք ներկայացնել բնակչության առողջության համար։