Ուկրաինան հարվածել է Պենզայի մարզում գտնվող «Ռոսկոսմոսի» գործարանին

Ուկրաինայի Զինված ուժերի գլխավոր շտաբը հայտնել է, որ հարված է հասցվել Ռուսաստանի Պենզայի մարզում գտնվող «Ֆիզիկական չափումների գիտահետազոտական ինստիտուտ» ռազմաարդյունաբերական ձեռնարկությանը, որը ներառված է «Ռոսկոսմոսի» կառուցվածքում։

Ուկրաինական կողմի տվյալներով՝ ձեռնարկությունն արտադրում է հրթիռների տվիչներ, ավիացիոն բորտային համակարգերի բաղադրիչներ, ինչպես նաև տիեզերական հետախուզական արբանյակների սարքավորումներ։ Գլխավոր շտաբի հաղորդմամբ՝ հարվածից հետո ձեռնարկության տարածքում արձանագրվել է ծխապատում, իսկ վնասի չափերը դեռևս ճշտվում են։

Ուկրաինայի նախագահ Վլադիմիր Զելենսկին ձեռնարկությունն անվանել է Ռուսաստանի ռազմաարդյունաբերական համալիրի ռազմավարական օբյեկտ՝ նշելով, որ այնտեղ մշակվում և արտադրվում են հրթիռային սպառազինության բաղադրիչներ, որոնք կիրառվում են Ուկրաինայի դեմ։ Նրա խոսքով՝ թիրախը գտնվում էր ռազմաճակատի գծից շուրջ 600 կիլոմետր հեռավորության վրա։

Պենզայի մարզպետ Օլեգ Մելնիչենկոն հաստատել է անօդաչու թռչող սարքերի հարձակման փաստը՝ հայտնելով, որ թիրախավորված օբյեկտում աշխատում են արտակարգ ծառայությունները։ Նրա խոսքով՝ նախնական տվյալներով զոհեր և վիրավորներ չկան։ Նահանգապետը նաև հայտնել է, որ խոցված ԱԹՍ-ի բեկորները վնասել են էլեկտրահաղորդման գծերը և ընկել կիսակառույց շենքի վրա։

Ուկրաինական անօդաչուները հարվածներ են հասցրել նաև Ուֆայի նավթավերամշակման գործարանին։ Զելենսկին նշել է, որ այն գտնվում է ռազմաճակատի գծից ավելի քան 1300 կիլոմետր հեռավորության վրա։ NASA-ի FIRMS արբանյակային ծառայությունը գործարանի տարածքում արձանագրել է հրդեհի օջախներ։

Բացի այդ, Ուկրաինայի անվտանգության ծառայությունը հայտարարել է բռնակցված Ղրիմի Սակիի ռազմական օդանավակայանում անգարների խոցման մասին։ Գերատեսչության տվյալներով՝ հարվածներ են հասցվել հինգ անօդաչու թռչող սարքերով, իսկ նախնական տեղեկություններով՝ երկու անգարներում գտնվել են Սու-30 և Սու-30ՍՄ կործանիչներ։ Ուկրաինական կողմը պնդում է, որ դրանցից մեկի գտնվելու անգարում հրդեհ է բռնկվել։

Իր հերթին, Ռուսաստանի պաշտպանության նախարարությունը հայտնել է, որ վերջին մեկ օրվա ընթացքում երկրի տարբեր շրջաններում, բռնակցված Ղրիմում, ինչպես նաև Ազովի և Սև ծովերի ջրատարածքներում խոցվել է 179 ուկրաինական անօդաչու թռչող սարք։ Ռուսաստանի ռազմական գերատեսչության հաղորդագրության մեջ նշվում է, որ թիրախների թվում եղել են նաև Պենզայի մարզը, սակայն Ուֆայի վրա հարձակման մասին չի հաղորդվում։