Ընտրակաշառքի համար դատապարտվածներն ընդմիշտ կզրկվեն պետական պաշտոններից. նախագիծ

Ազգային ժողովի պետա-իրավական հարցերի հանձնաժողովը դրական եզրակացություն է տվել ընտրակաշառքի պատժաչափերը խստացնող օրենսդրական նոր նախագծին։ «Քաղաքացիական պայմանագիր» խմբակցության պատգամավորների հեղինակած նախագծով առաջարկվում է էականորեն խստացնել ընտրակաշառք տալու, ստանալու և միջնորդելու համար նախատեսված քրեական պատիժները։

Հիմնական զեկուցող Վահագն Ալեքսանյանի խոսքով՝ ընտրակաշառքը շարունակում է մնալ ժողովրդավարական համակարգի գլխավոր սպառնալիքներից մեկը, քանի որ խաթարում է քաղաքացիների ազատ կամարտահայտությունը։

Նախագծի ամենաառանցքային փոփոխությամբ՝ ընտրակաշառքի համար դատապարտված անձինք ընդմիշտ կզրկվեն պետական և համայնքային ծառայության, վարչական կամ հայեցողական պաշտոններ զբաղեցնելու իրավունքից։ Այս սահմանափակումը գործելու է անկախ այն հանգամանքից՝ անձի դատվածությունը մարված է, թե վերացված։

Հեղինակները շեշտում են, որ պետական պաշտոնյաների նկատմամբ պետք է գործեն բարեվարքության բարձր չափանիշներ, և այս քայլով վերջ է դրվելու կոռուպցիոն այն մեխանիզմներին, որոնք տարիներ շարունակ խոչընդոտել են արդար ընտրությունների անցկացմանը։

Լրամշակված օրենսդրական փաթեթը ստացել է հանձնաժողովի հավանությունը և կընդգրկվի ԱԺ լիագումար նիստերի օրակարգում։