Փաշինյան․ «Օրինական չհաստատված հեռախոսը կարելի է միայն պոպոք կոտրել»

Հայաստանում բջջային հեռախոսների շուկան երկար ժամանակ եղել է ամենասև և ամենամեծ ստվերային ոլորտներից մեկը, սակայն այդ դարաշրջանն ավարտվում է։ Այս մասին հայտարարել է վարչապետ Նիկոլ Փաշինյանը՝ ընդգծելով, որ շուկայում այլևս չեն կարող շրջանառվել այնպիսի հեռախոսներ, որոնք չունեն օրինականության հաստատում։

«ՀՀ-ում ոչ մի հեռախոս, որի օրինական ճանապարհով ներմուծված լինելը չի հավաստիացվի, չի աշխատելու։ Դրանով առավելագույնը կարելի կլինի ընկույզ (պոպոք) կոտրել, բայց որպես հեռախոս օգտագործելու հնարավորություն չի լինի»,- նշել է վարչապետը։

«Ինչ էլ անենք՝ թռչենք վերև, իջնենք ցած, ջղայնանանք, կատաղենք, այդ շուկան մեղմ ժպտում է և շարունակում իր գործը»,- հավելել է նա:

Այս իրավիճակին վերջ տալու համար ներդրվում է հստակ մեխանիզմ։ Հիմնական խնդիրն ու պահանջն այն է, որ երբ բջջային հեռախոսը միացվի, այն չպետք է աշխատի Հայաստանի Հանրապետությունում, քանի դեռ չի հավաստիացվել, որ սարքավորումն օրինական ճանապարհով է ներմուծվել կամ պետության հետ հարաբերություններում չի հայտնվել այսպես կոչված «կանաչ գոտում»։

Նոր կարգավորումներն ու սահմանափակումները, ըստ վարչապետի, ուժի մեջ կմտնեն 2027 թվականի հունվարի 1-ից։ Այդ ժամկետից սկսած՝ չմաքսազերծված կամ անօրինական ճանապարհով երկիր բերված հեռախոսներն ուղղակի կզրկվեն կապի հնարավորությունից։