Հանրային ռադիոյի նախկին տնօրենի հայցն ընդդեմ Հանրային հեռարձակողի խորհրդի մերժվել է

Երևան քաղաքի առաջին ատյանի ընդհանուր իրավասության քաղաքացիական դատարանը՝ դատավոր Մալվինա Հարությունյանի նախագահությամբ, մերժել է Հանրային ռադիոյի նախկին տնօրեն Գարեգին Խումարյանի հայցն ընդդեմ Հանրային Հեռարձակողի Խորհրդի:Այս մասին Aravot.am-ին ասել է Գարեգին Խումարյանը:

Հիշեցնենք, որ նա պահանջում էր ոչ իրավաչափ ճանաչել 29.07.2024 թվականին Հայաստանի Հանրային հեռարձակողի խորհրդի նիստում Հանրային ռադիոյի գործադիր տնօրենի թափուր տեղի համալրման մրցույթում հաղթող ճանաչելու որոշումը:

«Դեռ փաստաբանների խմբի հետ չենք հանդիպել այս հարցերի շուրջ, դժվարանում եմ որոշում հայտնել այս պահին, մերժման հիմքերին ծանոթ եմ, բայց չեմ ուզում այս պահին գնահատական տալ, որովհետեւ առանձնապես կոմպետենտ չի լինի ասածս»,- նշել է Խումարյանը՝ միաժամանակ չբացառելով առաջին ատյանի դատարանից ստացված որոշման բողոքարկումը:

Նախորդ տարի կեղծ դատավարական փաստաթղթեր կազմելու վերաբերյալ իրեն առաջադրված մեղադրանքի մասին խոսելիս նա հայտնել է, որ այն չի ընդունում, համարում է բացարձակապես անհիմն, և այժմ գործը գտնվում է դատաքննության փուլում: «Այդ քրեական գործը ուղիղ շարունակությունն է Հանրային հեռարձակողի խորհրդի դեմ իմ հայցին»,- ասել է նա: