Շիրակի մարզում մեկնարկել են կարկուտի վնասների գնահատման աշխատանքները

Շիրակի մարզպետ Դավիթ Առուշանյանի հանձնարարականով վնասների գնահատման մարզային հանձնաժողովը նախօրեից սկսել է երեկոյան տեղացած ուժեղ կարկուտի պատճառած գույքային վնասների հաշվառումը, որն առավելապես արձանագրվել է Գյումրի քաղաքում։

Այս մասին հայտնում է Շիրակի մարզպետի աշխատակազմը։

Պատճառված վնասների գույքագրումը կատարվում է անմիջապես տեղերում՝ յուրաքանչյուր համայնքի տարածքում։ Մարզային հանձնաժողովը, սերտորեն գործակցելով համայնքային համապատասխան հանձնաժողովների հետ, իրականացնելու է վնասների մանրամասն ուսումնասիրություն և ճշտում։

Աշխատանքների ընթացքում հաշվառման է ենթարկվելու նաև գյուղատնտեսական նշանակության հողատարածքներին, ինչպես նաև մշակաբույսերին հասցված վնասը։

Ստեղծված իրավիճակում աշխատանքների կազմակերպման ընթացիկ փուլն ու հետագա քայլերը քննարկելու նպատակով տեղի է ունեցել խորհրդակցություն։ Հանդիպմանը մասնակցել են մարզպետի տեղակալ Ալբերտ Այվազյանը, ՀՀ ԱԻՆ ՓԾ Շիրակի մարզային փրկարարական վարչության պետ Արմեն Ափոյանը, ինչպես նաև մարզպետի և փրկարար ծառայության աշխատակազմերի պատասխանատու ներկայացուցիչները։