Հունգարիայի նախագահը ստորագրել է վարչապետի պաշտոնավարումը սահմանափակող փոփոխությունը

Հունգարիայի նախագահ Տամաշ Շույոկը վավերացրել է Սահմանադրության 16-րդ փոփոխությունը, որով սահմանափակում է մտցվում վարչապետի պաշտոնավարման ժամկետի համար։

«Արմենպրես»-ի փոխանցմամբ՝ նոր կարգավորումն արգելում է վարչապետի պաշտոնում այնպիսի անձի ընտրությունը, ով ընդհանուր առմամբ արդեն զբաղեցրել է այդ դիրքը նվազագույնը 8 տարի՝ հաշվի առնելով նաև ընդմիջումներով իրականացված պաշտոնավարումը։ Սահմանված 8 տարվա ժամկետի հաշվարկի մեջ ներառվելու է 1990 թվականի մայիսի 2-ից հետո ընկած ժամանակահատվածում սկսված վարչապետական գործունեությունը։

Հունգարական լրատվամիջոցները հայտնում են, որ սույն փոփոխության նախաձեռնողը իշխող «Տիսա» կուսակցությունն է, և խորհրդարանն այն հավանության էր արժանացրել հունիսի 15-ին։ Այս փոփոխությունն իրավական հարթությունում անհնար է դարձնում նախկին վարչապետ Վիկտոր Օրբանի վերադարձը կառավարության ղեկավարի կարգավիճակին։ Վերջինս Հունգարիայի վարչապետի պաշտոնը զբաղեցրել է 1998-2002 թվականներին, այնուհետև՝ 2010-2026 թվականներին։

Նախագահական պալատի փոխանցմամբ՝ երկրի ղեկավարն արձանագրել է, որ Մայր օրենքի փոփոխությունը լիովին համապատասխանում է սահմանված պահանջներին, և նախնական սահմանադրական վերահսկողության գործընթաց սկսելու որևէ հիմք առկա չէ։ Փոփոխության հիմնավորման մեջ նշված է, որ դրա նպատակն է հանդիսանում ժողովրդավարության և իրավունքի գերակայության սահմանադրական սկզբունքների պաշտպանությունը։

Միևնույն ժամանակ, Օրբանի գլխավորած «Ֆիդես» կուսակցությունը հանդես է եկել որոշման քննադատությամբ՝ այն անվանելով հետադարձ ուժ ունեցող և անձնավորված կարգավորում։