Արաքս գետի ափին պատնեշի կառուցման աշխատանքները շարունակվում են

ՀՀ տարածքային կառավարման և ենթակառուցվածքների նախարարությունը հայտնել է, որ Արաքսի ափին պատնեշի կառուցման աշխատանքները ընթացքի մեջ են։

Արաքս գետի ափին ամբարտակի կառուցման աշխատանքները շարունակվում են, ինչի մասին Sputnik Արմենիայի հարցմանն ի պատասխան տեղեկացրել են ՀՀ տարածքային կառավարման և ենթակառուցվածքների նախարարությունից: Գերատեսչությունից նշել են միայն, որ աշխատանքները շարունակվում են՝ այլ մանրամասներ չհայտնելով։

Դեռ նախորդ տարի Sputnik Արմենիան հայտնել էր, որ Հայաստանը Արաքսի ափին ամբարտակ կառուցելու խնդիրը 1,5 տարի համաձայնեցնում է Թուրքիայի հետ, թեև սահմանային գետերի և գետակների վերաբերյալ երկրների միջև գործող կոնվենցիայի համաձայն՝ Հայաստանը պարտավոր է սոսկ «ժամանակին զգուշացնել» շինարարական աշխատանքների մասին, իսկ «համաձայնեցման» անհրաժեշտություն չկա։

Արաքսավան և Բուրաստան համայնքների հատվածում Արաքս գետը դեպի նախկին հուն հետ վերադարձնելու նպատակով կառուցվող պատնեշի արժեքը կազմելու է մոտ 1 մլն դոլար։ Հայկական կողմում ավազի ապօրինի արդյունահանման հետևանքով Արաքսի հունը, որով անցնում է Թուրքիայի հետ սահմանագիծը, փոփոխվել է, ինչի պատճառով ձևավորվել է շուրջ 330 հեկտար տարածքով կղզի։ Խնդիրներից խուսափելու նպատակով նախարարությունն առաջարկել է կառուցել շուրջ 130 մետր երկարություն և 8 մետր խորություն ունեցող պատնեշ, որպեսզի ջրի հոսքը ուղղվի դեպի նախկին հուն։

Միաժամանակ, Նազելի Բաղդասարյանը հերքում է Թուրքիայի հետ Արաքս գետի վերաբերյալ «գործարքի» առկայությունը։