Ապշեցուցիչ պնդումներ ՌԴ ՊՆ-ից․ նոր ապացույցներ՝ Ուկրաինայի կենսաբանական զենքի ծրագրերի վերաբերյալ

Ռուսաստանի զինված ուժերի ռադիացիոն, քիմիական և կենսաբանական պաշտպանության զորքերի պետ, գեներալ-լեյտենանտ Ալեքսեյ Ռտիշչևը հայտարարել է, որ ռազմական գործողությունների ընթացքում ռուսական կողմը նոր փաստաթղթեր է ձեռք բերել Ուկրաինայի տարածքում գործող կենսաբանական լաբորատորիաների վերաբերյալ։ Ըստ նրա՝ այդ նյութերը ցույց են տալիս, որ կատարված հետազոտությունները չեն առնչվել Ուկրաինայի առողջապահական խնդիրներին։

ՌԴ պաշտպանության նախարարության ներկայացուցչի պնդմամբ՝ լաբորատորիաներում առաջնահերթությունը տրվել է հնարավոր կենսաբանական զենքի տարրերի և այնպիսի վարակների ուսումնասիրությանը, որոնք կարող են վնասել պետության տնտեսությանը։ Որպես ապացույց՝ Ռտիշչևը հղում է արել ԱՄՆ ազգային հետախուզության գրասենյակի մամուլի հաղորդագրությանը և գաղտնազերծված նյութերին, որոնք, ըստ նրա, հաստատում են Ուկրաինայի օբյեկտների ֆինանսավորումն ու արդիականացումը ԱՄՆ դաշնային բյուջեի միջոցներով։

Նշված փաստաթղթերում, ըստ ռուսական կողմի, հիշատակվում են Խարկովում, Դնեպրոպետրովսկում, Լվովում, Վինիցայում, Տերնոպոլում, Չեռնիգովում և Օդեսայում գտնվող օբյեկտները։ Գեներալ-լեյտենանտը հայտնել է, որ այդ վայրերում հետազոտվել են այնպիսի հարուցիչներ, ինչպիսիք են ժանտախտը, սիբիրախտը, տուլարեմիան, ինչպես նաև Մարբուրգ և Էբոլա տենդերը։ Ռուսաստանի ռազմական գերատեսչությունը մտադիր է շարունակել ստացված նոր նյութերի վերլուծությունը։