ՌԴ-ն փակագծեր է բացում․ Հայաստանից ներմուծման սահմանափակումների իրական պատճառները

Հայկական արտադրանքի նկատմամբ կիրառված արգելքները պայմանավորված են բացառապես անվտանգության և որակի խնդիրներով:

Ռուսաստանի անասնաբուժական և բուսասանիտարական վերահսկողության դաշնային ծառայության («Ռոսսելխոզնադզոր») ղեկավար Սերգեյ Դանկվերտը հայտարարել է, որ Հայաստանից ներկրվող որոշ սննդամթերքների նկատմամբ սահմանված արգելքները քաղաքական դրդապատճառներ չունեն։ Ըստ պաշտոնյայի՝ որոշումների հիմքում ընկած են լաբորատոր հետազոտությունների արդյունքներն ու արձանագրված խախտումները։

«Ռոսիյսկայա գազետա» պարբերականին տված հարցազրույցում գերատեսչության ղեկավարը նշել է, որ Հայաստանում հիմնական խնդիրը կապված է արտադրության կազմակերպման և վերահսկողության համակարգի հետ։ Արտահանվող ապրանքի զգալի մասն ապահովում են փոքր տնտեսությունները, սակայն արտադրության և բեռնառաքման փուլերի միջև բացակայում է ներքին պատշաճ վերահսկողությունը։

Դանկվերտի խոսքով՝ խոշոր խմբաքանակների ձևավորման ժամանակ վերահսկող մարմինների համար ֆիզիկապես անհնար է դառնում ապահովել ամբողջական ստուգումը։ Խնդրի կարգավորման համար առաջարկվում է ներդնել արտադրական վերահսկողության մեխանիզմներ հենց սկզբնական փուլում, ինչպես նաև մեծացնել արտադրողների միավորումների պատասխանատվությունը։