Ռուսաստանից կրկին անդրադարձել են Հայաստանին․ ինչ են հայտարարել

Հունիսի 15-17-ը Ռուսաստանի Դաշնության արտաքին գործերի նախարար Սերգեյ Լավրովի հրավերով Թուրքիայի Հանրապետության արտաքին գործերի նախարար Հաքան Ֆիդանը աշխատանքային այցով կժամանի Մոսկվա՝ երկկողմ և միջազգային օրակարգի հարցերի լայն շրջանակի շուրջ բանակցություններին մասնակցելու համար։ Այս մասին հայտնում է ՌԴ ԱԳՆ-ն։

«Առանձին շեշտադրում է նախատեսվում կատարել Անդրկովկասում փոխգործակցության ընդլայնման հեռանկարների վրա, ներառյալ տրանսպորտային հաղորդակցությունների և կապուղիների ապաշրջափակումը, ինչպես նաև տարածաշրջանի հետկոնֆլիկտային վերականգնումը: Ռուսաստանը և Թուրքիան շահագրգռված են խաղաղ և կանխատեսելի Հարավային Կովկասով: Դրան կարելի է հասնել «3+3» տարածաշրջանային համագործակցության հարթակի շրջանակներում համատեղ ջանքերի գործադրման միջոցով:

Ռուսաստանը ողջունում է հայ-թուրքական կարգավորման գործընթացը»,- նշվում է հաղորդագրությունում։

Նշվում է, որ կողմերը քննարկելու են Մերձավոր Արևելքի, Սիրիայի, Անդրկովկասի և Սևծովյան տարածաշրջանի անվտանգային իրավիճակը, ինչպես նաև առևտրատնտեսական համագործակցության ընդլայնման, էներգետիկ նախագծերի և զբոսաշրջությանը վերաբերող և այլ հարցեր։