Գլխավոր դատախազի հրամանով 2 դատախազի նկատմամբ նշանակվել է կարգապահական տույժ

ՀՀ գլխավոր դատախազությունը հայտնում է, որ 2026 թվականի հունվարի 21-ին Սիսիանի և Կապանի կայազորների զինվորական դատախազությունների երկու ինքնավար պաշտոն զբաղեցնող անձանց նկատմամբ հարուցվել է կարգապահական վարույթ:

ՀՀ գլխավոր դատախազին առընթեր էթիկայի հանձնաժողովը 2026 թվականի հունիսի 10-ի նիստում հաստատված է համարել հիշյալ դատախազների գործողություններում կարգապահական խախտման առկայությունը: Մինչդատական վարույթի օրինականության համար պատասխանատու դատախազները սահմանված ժամկետում վարույթն իրականացնող մարմնից չեն պահանջել մի շարք քրեական վարույթներ և ժամանակին չեն ընդունել համապատասխան դատախազական ակտեր:

Գլխավոր դատախազի 2026 թվականի հունիսի 12-ի որոշմամբ՝ Սիսիանի կայազորի զինվորական դատախազության ինքնավար պաշտոն զբաղեցնող անձի նկատմամբ կիրառվել է «նկատողություն» տեսակի կարգապահական տույժ: Նվազ խիստ տույժի նշանակումը պայմանավորված է նրանով, որ տվյալ դատախազը, իր հսկողության ներքո գտնվող քրեական վարույթների նկատմամբ հսկողությունից զատ, ղեկավարել ու կազմակերպել է նաև Կապանի կայազորի զինվորական դատախազության աշխատանքները, որտեղ նախկինում զբաղեցրել է ինքնավար պաշտոն:

Գլխավոր դատախազի նույն օրվա մեկ այլ որոշմամբ՝ Կապանի կայազորի զինվորական դատախազությունում ինքնավար պաշտոն զբաղեցնող անձի նկատմամբ նշանակվել է կարգապահական տույժ՝ «դասային աստիճանի իջեցում՝ մեկ աստիճանով»: