16:00 Լուրերը մեկ տողով. Ուժգին երկրաշարժ է գրանցվել. իշխանությունը զավթելու փորձի մեղադրանք

Անցած ժամվա լուրերը՝ հակիրճ և բովանդակային.

•ԿԸՀ-ն անվավեր է ճանաչել թիվ 12/13 տեղամասի ընտրության արդյունքները և նյութերն ուղարկել դատախազություն: Որոշման պատճառն է դարձել քվեարկության օրը տվյալ տեղամասում քվեաթերթիկներից մեկի բացակայությունը:

•Իշխանությունը զավթելու և սահմանադրական կարգը տապալելու կոչերի համար ձերբակալվել է քաղաքագետ Ալեն Ղևոնդյանը: Քննչական կոմիտեն սոցցանցերում արված հրապարակային կոչերի փաստով երկու քրեական վարույթ է նախաձեռնել:

•Դատարանում անդրադարձ է կատարվել Սամվել Կարապետյանի էլեկտրոնային հսկողության սարքի երկժամյա անսարքությանը: Խափանման միջոցի վերահսկման խնդիրը պայմանավորված է եղել մարտկոցի լիցքավորումն իրականացնելու մոռացությամբ:

•Ներքին գործերի նախարարությունը վերջնականացրել է նոր կենսաչափական անձնագրերի դիզայնը: Արփինե Սարգսյանը հայտնել է, որ նոր որակի ու ստանդարտի ծառայությունները քաղաքացիներին կմատուցվեն 2026 թվականի աշնանից:

•Երևանի կենտրոնում մեքենաների շարժը սահմանափակելու քաղաքապետարանի մտադրությունը քննադատության է արժանացել: Փորձագիտական դաշտից նշում են, որ խցանումների դեմ պետք է պայքարել հանգույցների ու ճանապարհների կառուցմամբ, այլ ոչ թե արգելքներով:

•Ադրբեջանի տարածքում գրանցվել է 5․1 մագնիտուդով ուժգին երկրաշարժ: ՆԳՆ սեյսմիկ ծառայության տվյալներով՝ ստորգետնյա ցնցման ուժգնությունը էպիկենտրոնային գոտում կազմել է 7 բալ:

•Եվրահանձնաժողովն առաջարկել է 540 միլիոն եվրո հատկացնել ֆերմերներին պարարտանյութերի գների աճի պատճառով: Ակնկալվում է, որ համայնքային և ազգային աջակցության միջոցներով ընդհանուր օգնության ծավալը կհասնի 1,5 միլիարդ եվրոյի: