Ծիրանի արտահանման խթանները և ներքին շուկայի հնարավոր խնդիրները

ՀՀ վարչապետ Նիկոլ Փաշինյանը կառավարության նիստում մտահոգություն է հայտնել, որ մեծ խթանների պատճառով Հայաստանում կարող է ծիրան չմնալ և ստիպված լինեն նույն ապրանքը հետ ներմուծել:

Գները նայելուց հետո փոխհատուցման վերաբերյալ առաջացած առաջին հարցն այն էր, թե արդյոք համոզված են, որ հետագայում ստիպված չեն լինի նույն ապրանքները հետ ներմուծել: 

Ըստ վարչապետի՝ քանի որ սահմանվում են մեծ խթաններ, հնարավոր է պարզվի, որ Հայաստանի Հանրապետությունում ծիրան չի մնացել։ Ի պատասխան նշվել է, որ չափաքանակները որոշելիս հաշվի են առնվել սեզոնայնությունը և ապրանքների սեզոնայնության զգայունությունը գնի նկատմամբ: 

Այս փուլում, քանի որ եղանակային պայմանների պատճառով գյուղատնտեսական տարին մի փոքր ուշացած է, ծիրանի հիմնական բերքահավաքը սկսվելու է հունիսի 15-ին, մինչդեռ նախորդ տարի այն մեկնարկել էր արդեն մայիսի 25-ից 30-ն ընկած ժամանակահատվածում: Գնային տարբերությունները հաշվի են առնվել հենց այդ նկատառումով: Վարչապետը կատակել է, որ  Երևանից մարդիկ չզանգեն Փարիզի իրենց բարեկամներին ու խնդրեն իրենց ծիրան ուղարկեն: