ԵՊՀ-ն մտադիր է փակել հնագույն ամբիոններից մեկը

ԵՊՀ Արտասահմանյան գրականության ամբիոնի վարիչ, ընդդիմադիր քաղաքական գործիչ Անուշ Սեդրակյանը հայտնել է մայր բուհի ամենահին և կարևոր ամբիոններից մեկի հնարավոր ցրման մասին:

«Հրապարակի» հետ զրույցում ԵՊՀ Արտասահմանյան գրականության ամբիոնի ղեկավար Անուշ Սեդրակյանը տեղեկացրել է, որ ռեկտորատից Եվրոպական լեզուների և հաղորդակցության ֆակուլտետի դեկանի ժամանակավոր պաշտոնակատարին հայտնել են ամբիոնի լուծարման մտադրության մասին։ 

Նշենք, որ Սեդրակյանը քաղաքագետ է, ով ընտրական գործընթացներին մասնակցել է «Միասնության թևեր» կուսակցության ընտրացուցակով, հանդիսանում է ընդդիմադիր գործիչ և քննադատական կեցվածք ունի Փաշինյանի ու գործող իշխանությունների նկատմամբ։

Միևնույն ժամանակ, տվյալ ֆակուլտետում ներկայումս իրականացվում է «Արտասահմանյան գրականություն» մագիստրոսական ծրագիրը, որով սովորում են մի շարք ուսանողներ։

Անուշ Սեդրակյանը հավաստիացրել է, որ այս որոշումը կապված է իր ընդդիմադիր քաղաքական հայացքների և իշխանություններին սուր քննադատության ենթարկելու հետ. «Դեկանին տեղեկացրել են, որ առաջիկա գիտական խորհրդին դրվելու է մեր ամբիոնը ցրելու հարցը, և տարբեր ակնարկներով հասկացրել են, որ այդ որոշումը կապված է իմ քաղաքական հայացքների հետ, քանի որ ես ընդդիմադիր եմ, դա է պատճառը: Հարց է առաջանում` ինչպե՞ս է համալսարանը առանց Արտասահմանյան գրականության ամբիոնի շարունակելու իր գործունեությունը: Անգամ ինձ տեղյակ չեն պահել այս մտադրության մասին, սակայն ասել են, որ ես տեղյակ եմ այդ ամենից: Ես որտեղի՞ց պետք է տեղյակ լինեի, հավանաբար նրանից, որ ինձ տարբեր օղակներով փոխանցում էին, որ դադարեցնեմ քաղաքականությամբ զբաղվել»»: