18:00 Լուրերը մեկ տողով. Սիրուշոյի խանութի խաչի սկանդալը, հայկական ծիրանի նոր շուկան

Անցած ժամվա լուրերը՝ հակիրճ և բովանդակային.

•Հակակոռուպցիոն կոմիտեն կոռուպցիոն բնույթի ընտրական խախտումների փաստերով նախաձեռնել է 115 քրեական վարույթ: 

•Փողերի լվացման և ընտրողներին նյութապես շահագրգռելու քրեական գործով «Ուժեղ Հայաստան» դաշինքի 6 թեկնածուների նկատմամբ հարուցվել է քրեական հետապնդում, որոնցից երկուսն արդեն հայտնաբերվել և կալանավորվել են:

•«Լուսավոր Հայաստան» կուսակցության ղեկավարությունը հայտարարում է ընտրատեղամասերում ստացած ձայների անհետացման և ԿԸՀ կայքում սխալ տվյալներ հրապարակելու մասին, ինչը զրկում է իրենց օրենքով նախատեսված պետական ֆինանսավորումից:

•«Ուժեղ Հայաստան» դաշինքը ներկայումս մանրակրկիտ ուսումնասիրում և արձանագրում է ընտրական գործընթացում տեղի ունեցած բոլոր խախտումները՝ հայտարարելով, որ հետագա քաղաքական որոշումները կայացվելու են բացառապես հիմնավոր ապացույցների հիման վրա:

•Երևանի քաղաքապետը քննադատել է ընտրական խախտումներից բողոքող ընդդիմադիրներին՝ նրանց մեղադրելով համատարած ընտրակաշառք բաժանելու մեջ և հաղթանակի կապակցությամբ շնորհավորելով աջակիցներին:

•Երգչուհի Սիրուշոն հայտնել է․ «Մեզ ասել են, որ մինչև ամսի 11-ը Պռեգոմեշի խանութի վրայից պիտի հանվի մեծ խաչը, հակառակ դեպքում տուգանվելու ենք»: Քաղաքապետարանը պարզաբանել է երգչուհի Սիրուշոյի «Պռեգոմեշ» բրենդային խանութի ցուցափեղկից էլեմենտները հեռացնելու պահանջը՝ նշելով, որ դրանք տեղադրվել են առանց համապատասխան թույլտվության և չափորոշիչների պահպանման:

• Ռուսական սահմանափակումներից հետո Հայաստանը փորձում է հայկական ապրանքների համար նոր շուկաներ գտնել, և հայ-լեհական գործարար ֆորումի արդյունքում հունիսի վերջին հայկական ծիրանով բեռնված առաջին մեքենաները կմեկնեն Լեհաստան: