Թուրքիայից նոր հայտարարություն՝ Հայաստանի վերաբերյալ

Թուրքիան շարունակում է երկխոսությունը Հայաստանի հետ՝ Ադրբեջանի հետ համակարգմամբ: Մենք աջակցում ենք Ադրբեջանի և Հայաստանի միջև հարաբերությունների կարգավորման գործընթացին։ Այս մասին Ստամբուլում կայացած մամուլի ասուլիսի ժամանակ հայտարարել է Թուրքիայի արտաքին գործերի նախարար Հաքան Ֆիդանը՝ Թուրքիայի, Ադրբեջանի և Վրաստանի արտաքին գերատեսչությունների ղեկավարների եռակողմ հանդիպումից հետո, հայտնում են ադրբեջանական լրատվամիջոցները։

Նա ընդգծել է, որ Թուրքիան ակնկալում է Ադրբեջանի և Հայաստանի միջև խաղաղության պայմանագրի շուտափույթ ստորագրում՝ առանց որևէ հապաղման։

Նախարարի խոսքով՝ Ադրբեջանի օրինական և հիմնավորված մտահոգությունները պետք է փարատվեն։

ԱԳՆ ղեկավարը հայտարարել է, որ Թուրքիան կանի հնարավոր ամեն ինչ Հարավային Կովկասում խաղաղություն հաստատելու համար, իսկ կողմերի ցուցաբերած քաղաքական կամքը տարածաշրջանի համար հնարավորությունների կոնկրետ պատուհան է բացել։

Նա նաև ուշադրություն է հրավիրել այն փաստի վրա, որ վերջին չորս տարիների ընթացքում Թուրքիայի և Հայաստանի միջև հարաբերությունների կարգավորման գործընթացի շրջանակներում զգալի առաջընթաց է գրանցվել։