Ստիպված էին այդ ընտրությունն անել․ ԵԽԽՎ դիտորդները՝ Հայաստանում կայացած ընտրությունների մասին

Արձանագրել ենք բազմաթիվ խնդիրներ, բայց պետք է արձանագրել, որ Հայաստանի ընտրողներին տրվել է իրական ընտրություն կատարելու հնարավորություն, թեև խիստ բևեռացված քարոզարշավի պայմաններում, Երևանում այս մասին հայտարարել է ԵԽԽՎ դիտորդական առաքելության ներկայացուցիչ Յանես Լենարչիչը։

«Ցավոք, նրանք ստիպված էին այդ ընտրությունն անել աննախադեպ արտաքին միջամտության և ճնշումների պայմաններում»,- ասել է Յանես Լենարչիչը։

Նա նշել է, որ քարոզարշավը եղել է խիստ բևեռացված և առճակատային, ուղեկցելով պարբերաբար հնչող պառակտիչ և սադրիչ հռետորաբանությամբ։

«Մենք չենք արձանագրել վարչական ռեսուրսների համակարգային չարաշահում տեղական մակարդակում, սակայն մեր դիտորդներն արձանագրել ու ստացել են բազմաթիվ հաղորդումներ ընտրողների, այդ թվում՝ հանրային ծառայողների նկատմամբ ճնշումների և խրախուսումների վերաբերյալ՝ քարոզչական միջոցառումներին մասնակցելու նպատակով, հիմնականում հենց իշխող կուսակցության կողմից»,- ասել է Լենարչիչը։

Նրա խոսքով՝ իրենց երկարաժամկետ դիտորդները Երևանից և մարզերի մեծ մասից հաղորդումներ են ստացել, որոնք նկարագրում են ընդդիմության կողմնակիցների շրջանում վախի մթնոլորտը։

«Այս հաղորդումները վերաբերում են ընդդիմադիր ակտիվիստների նկատմամբ ենթադրյալ ահաբեկումներին, կալանավորումներին։ Որոշ տարածքներում դա ազդել է ընտրողների վրա»,- հայտարարել է  ԵԽԽՎ դիտորդական առաքելության ներկայացուցիչ Յանես Լենարչիչը։