ԿԸՀ-ից պարզաբանում են՝ Նիկոլ Փաշինյանի՝ ընտրախախտման վերաբերյալ արված հայտարարություններին

Կենտրոնական ընտրական հանձնաժողովից խախտում չեն համարում, որ վարչապետ Նիկոլ Փաշինյանը ընտրատեղամաս է գնացել Հայաստանի քարտեզը պիջակին ամրացրած: Ընտրական հանձնաժողովի անդամ Սիլվա Մարկոսյանի խոսքով՝ քարոզչական նյութերի օգտագործումն ընտրողների կողմից խախտում չէ, իսկ ընտրատեղամասում գտնվելու իրավունք ունեցողների դեպքում միանշանակ խախտում է, տեղեկանում ենք «Ազատություն»-ից։

«Քարոզչական նյութերի վերաբերյալ մենք շատ խիստ ենք վերաբերվում, երբ դրանք կրում են տեղամասում գտնվելու իրավունք ունեցող անձինք՝ վստահված անձ, ԶԼՄ ներկայացուցիչ, դիտորդ և այլն: Իրենց կարող ենք պարտադրել, որ չանեն, բայց ընտրողների դեպքում գերակա է նրանց ընտրելու իրավունքը, ցանկալի չէ, բայց չենք կարող որևէ միջոց կիրառել: Իսկ վստահված անձանց դեպքում շատ խիստ ենք», - ասել է Մարկոսյանը:

ԿԸՀ մամուլի խոսնակ Սեդա Ղուկասյանն էլ հավելել է՝ եթե ընտրողներն են կրում քարոզչական իրեր, ապա հանձնաժողովի անդամը պետք է դուրս հրավիրի ընտրողին և նրա վերադարձը թույլ տա միայն այն դեպքում, երբ ազատվի այդ իրերից: