Հոսանքազրկումները չեն ազդի քվեարկության արդյունքների վրա. ԿԸՀ նախագահ

Կենտրոնական ընտրական հանձնաժողովի նախագահ Վահագն Հովակիմյանը հրավիրված ասուլիսում վստահեցրել է, որ հավանական հոսանքազրկումները որևէ ազդեցություն չեն ունենա քվեարկության գործընթացի և արդյունքների ամփոփման վրա։

ԿԸՀ ղեկավարի պարզաբանմամբ՝ ընտրական տեղամասերն ապահովված են լեդ լամպերով, նույնականացման համար նախատեսված սարքավորումներն աշխատում են մարտկոցներով, իսկ տեսախցիկները տեսաձայնագրումը շարունակում են նույնիսկ էլեկտրաէներգիայի բացակայության պայմաններում։

 Վահագն Հովակիմյանը միաժամանակ անդրադարձել է համացանցում տարածված այն տեսանյութին, որտեղ երևում է ընտրատեղամասից քվեաթերթիկներ դուրս բերելու գործընթացը։ Նա նշել է, որ տեսանյութի կինը տվյալ ընտրատեղամասի հանձնաժողովի նախագահն է, և կատարվածը կենթարկվի ուսումնասիրության։