Արամ Սարգսյանը քվեարկել է Արարատ գյուղում

«Հանրապետություն» կուսակցության վարչապետի թեկնածու Արամ Սարգսյանն իր քվեարկությունն է կատարել Արարատ գյուղի Վազգեն Սարգսյանի անվան դպրոցում գտնվող ընտրատեղամասում:

«Լուրեր»-ի հետ ունեցած զրույցում Սարգսյանը նշել է, որ քվեարկել է այն համոզմունքով, որ Հայաստանը դառնալու է ինքնիշխան, ժողովրդավար և զարգացող պետություն աշխարհի ընտանիքում: Արամ Սարգսյանը նաև խոսել է Կենտրոնական ընտրական հանձնաժողովի կողմից «Հանրապետություն» կուսակցության այն միջնորդության մերժման մասին, որով պահանջվում էր ուժը կորցրած ճանաչել «Ուժեղ Հայաստան» դաշինքի ընտրական ցուցակի գրանցումը:

«Իրավաբանական թիմը, որ կատարել էր այդ աշխատանքը, բարձր պրոֆեսիոնալներ են, և խնդիրը ոչ թե ենթադրությունների հենքով էին, այլ այն հարյուրավոր ՀԿԿ կողմից տարածված նյութերի, կալանավորումների, նաև դրսից հնչող, դրսից Հայաստան եկող հարյուր հազարավոր մարդկանց համացանցում արված հայտարարությունները: Գիտեք, մենք փողոցներով անցնելով, տնետուն համոզում ենք մարդկանց գան ու արդար քվեարկություն անեն, և մեզնից հետո հայտնվում են մարդիկ, որոնք 500 հազար կամ 1 մլն դրամ գումար են առաջարկում, ու դա հավասարության սկզբունքը խախտում է, և ես, այո՛, դիմել եմ ԿԸՀ՝ անվավեր ճանաչելու և գտնում եմ, որ ճիշտ եմ արել, և ճիշտ կլիներ, որ արևմտյան արժեքներ կրող քաղաքական ուժերը նույնը անեին, ոչ թե կողքից հետևեին, թե «Հանրապետություն» կուսակցությունն ինչ է անում»,- ասել է Սարգսյանը:

«Լուրեր»