Ինչ է ակնկալում Մոսկավան Բաքվից. Զախարովան պարզաբանում է

Մոսկվան ակնկալում է Բաքվում ձերբակալված ՌԴ քաղաքացիների շուտափույթ ազատ արձակումը և մշտական կապի մեջ է նրանց փաստաբանների հետ։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

«Ակնկալում ենք անցյալ տարվա ամռանը հանրապետությունում ձերբակալված ՌԴ տասնմեկ քաղաքացիների շուտափույթ ազատ արձակումը։ Ինչպես գիտեք, մշտական կապի մեջ ենք մեր հայրենակիցների հարազատների ու փաստաբանների հետ և ադրբեջանական կողմի հետ շարունակում ենք երկխոսություն վարել բոլոր հարցերի շուրջ», — ասել է նա Սանկտ Պետերբուրգի միջազգային տնտեսական համաժողովի շրջանակում անցկացված ճեպազրույցի ժամանակ։

Հիշեցնենք, որ հուլիսին Ադրբեջանի Ներքին գործերի նախարարությունը Բաքվում իրականացված օպերատիվ-հետախուզական միջոցառումների ընթացքում ձերբակալել էր ենթադրյալ կազմակերպված հանցավոր երկու խմբի անդամների՝ ՌԴ քաղաքացիների, որոնք կասկածվում են Իրանից թմրանյութերի տարանցման, դրանց առցանց ապօրինի շրջանառության և կիբերհանցագործության մեջ։ 8 ձերբակալվածի նկատմամբ խափանման միջոց էր ընտրվել 4 ամիս ժամկետով կալանքը։