Ադրբեջանը շահարկում է անհետ կորածների թեման․ Բաքվից նոր մեղադրանքներ՝ Հայաստանի հասցեին

Հերթական ապատեղեկատվական արշավն են իրականացնում ադրբեջանական լրատվամիջոցները, հրապարակելով ցուցակ, որտեղ նշվում է․

 «Հայաստանի ռազմական ագրեսիայի հետևանքով անհետ կորած Ադրբեջանի քաղաքացիների թիվը թարմացվել է։

Ադրբեջանի ռազմագերիների, պատանդների և անհետ կորած քաղաքացիների հարցերով պետական հանձնաժողովը նոր տվյալներ է հրապարակել հակամարտության տարիներին անհետացած անձանց թվաքանակի վերաբերյալ։ Ըստ պաշտոնական աղբյուրի՝ ներկայումս անհետ կորած է համարվում 4009 Ադրբեջանի քաղաքացի, որոնց հիմնական մասը գրանցվել է ղարաբաղյան առաջին պատերազմի տարիներին։

Հրապարակված վիճակագրության համաձայն՝ անհետ կորածների ցուցակում ներառված անձանցից 4003-ը չեն հայտնաբերվել 1990-ականների սկզբի մարտական գործողությունների ժամանակաշրջանից ի վեր։ Եվս 6 քաղաքացի անհետացածների ցանկում է հայտնվել 2020 թվականի 44-օրյա պատերազմի ընթացքում։

Առաջին պատերազմի տարիներին անհետացած 4003 անձանցից 3221-ը եղել են զինվորականներ, իսկ 782-ը՝ քաղաքացիական անձինք, այդ թվում՝ 71 երեխա, 288 կին և 319 տարեց։ Սեռային բաշխվածությամբ անհետ կորածների թվում գերակշռում են տղամարդիկ՝ 3714 հոգի, իսկ կանանց ընդհանուր թիվը կազմում է 289»,- ասվում է հրապարակման մեջ։

Հավելենք՝ նշված թվերը ներկայացված են ադրբեջանական կողմից,  որևէ հստակ արձագանք դեռ չկա այս հրապարակման վերաբերյալ։