Ինչ գին կվճարի Հայաստանը ԵՄ–ի համար. Պուտինի կարևոր հայտարարությունները

Վլադիմիր Պուտինը հայտարարել է, որ Հայաստանի՝ Եվրամիությանը անդամակցելու հարցով երկխոսությունը պետք է կառուցվի բացառապես լիակատար բացության և ազնվության սկզբունքների վրա։

ՌԴ նախագահը հավելել է, որ մինչև Երևանի կողմից ԵՄ-ին անդամակցելու վերաբերյալ որոշում կայացնելը, անհրաժեշտ է ամեն ինչ հաշվարկել, գնահատել և միայն հետո որոշում ընդունել։

Պուտինը հիշեցրել է ԵԱՏՄ-ի շրջանակում համագործակցության առավելությունների մասին՝ ընդհանուր շուկա, մաքսատուրքերի բացակայություն, պարզեցված լոգիստիկա և էներգակիրների ցածր գներ։ Նրա խոսքով՝ Հայաստանում կուտակված ներդրումների ծավալը կազմում է շուրջ 4,9 միլիարդ դոլար, որոնց 86%-ը ռուսական ծագում ունի։

Նա նշել է, որ ԵՄ-ին անցումը կհանգեցնի մաքսային վերահսկողության և մաքսատուրքերի ամբողջական վերականգնմանը, ինչպես նաև առևտրի և զբոսաշրջության կրճատմանը։

«Ստիպված կլինենք վերականգնել հայկական փոխադրողների համար թույլտվությունների համակարգը։ Դա անխուսափելի է։ Եվ ստիպված կլինենք բարձրացնել երկաթուղային փոխադրումների սակագները»,- հավելել է ՌԴ նախագահը։

Նա նաև խոսել է Հայաստանի՝ ԵՄ-ին անդամակցելու ծրագրերի մասին․

«Խոսքը զուտ տնտեսակա ն բաղադրիչների մասին է։ Ամեն ինչ պետք է հաշվարկել: Ռուսաստանի և Հայաստանի միջև հումանիտար կապերը չեն տուժի Երևանի՝ Եվրամիության հետ մերձեցմանն ուղղված տնտեսական որոշումների պատճառով։ Եթե Հայաստանը սկսի անցում կատարել ԵՄ չափանիշներին, ապա նրա հետ ինտեգրումը օբյեկտիվորեն ստիպված կլինենք դադարեցնել»,– նշել է նա՝ հավելելով.

«Հայաստանի քաղաքացիների համար, եթե երկիրը դուրս գա ԵԱՏՄ-ից, կգործեն միգրանտների նկատմամբ կիրառվող սովորական պահանջները:

«Մենք ճիշտ ենք համարում, որ Հայաստանում հնարավորինս շուտ անցկացվի հանրաքվե, որի ընթացքում կորոշվի, թե Հայաստանը որտեղ պետք է լինի՝ Եվրամիությունո՞ւմ, թե՞ Եվրասիական միությունում»։ Այդ մասին հայտարարել է ՌԴ նախագահ Վլադիմիր Պուտինը»:

Պուտինը խոսել է նաև Հայաստանի հետ հարաբերությունների մասին․ «Ես Փաշինյանին ասել եմ՝ այն ամենը, ինչ լավ է հայ ժողովրդի համար, ընդունելի կլինի նաև Ռուսաստանի համար։ Բայց այստեղ խոսքը զուտ տնտեսական հարցերի մասին է։ Ուկրաինայում ճգնաժամն էլ հենց դրանից սկսվեց»։