Ռուսաստանից սպառնալիքներ են հնչում․ զգուշացնում են՝ Հայաստանին սպասվող սցենարի մասին

Մայիսի 22-ից Ռուսաստանը ժամանակավորապես արգելել է հայկական ծաղկի ներկրումը, ինչը կարող է զրկել Հայաստանին այս ոլորտից ստացվող արտահանման հասույթի ավելի քան 90 տոկոսից։

Ազգային վիճակագրական ծառայությունների տվյալների համաձայն՝ անցած 2025 թվականին Հայաստանը ծաղիկների արտահանումից ընդհանուր առմամբ ստացել է 49,1 միլիոն դոլարի եկամուտ։ Այս գումարից 46 միլիոն դոլարը ձևավորվել է դեպի Ռուսաստանի Դաշնություն իրականացված մատակարարումների հաշվին։ Այսպիսով, ռուսական շուկան նախորդ տարի ապահովել է հայկական ծաղկի վաճառքից ստացված ամբողջ հասույթի 93,8 տոկոսը։

Հայաստանից ծաղիկների արտահանման մյուս ուղղություններն ունեն անհամեմատ փոքր տեսակարար կշիռ։ Մասնավորապես, արտահանման ընդհանուր ծավալի մոտ 5 տոկոսն ուղղվել է Վրաստան (2,3 միլիոն դոլար), իսկ 1 տոկոսը՝ Ղազախստան (514,9 հազար դոլար)։ Հայկական ծաղկային արտադրանքի փոքր խմբաքանակներ են գնվել նաև այլ երկրների կողմից, որոնց թվում ծավալներով առանձնանում են Արաբական Միացյալ Էմիրությունները (166,7 հազար դոլար) և Բելառուսը (61,6 հազար դոլար)։ 

Հիշեցնենք՝  Ռուսաստանի անասնաբուժական և բուսասանիտարական վերահսկողության դաշնային ծառայությունը («Ռոսսելխոզնադզոր») մայիսի 22-ից ուժի մեջ է մտցրել Հայաստանից ծաղկային արտադրանքի ներմուծման ժամանակավոր սահմանափակումներ։ Ռուսական կողմի պարզաբանմամբ՝ որոշումը կայացվել է երկրի բուսասանիտարական անվտանգությունն ու արտահանման ներուժը պաշտպանելու նպատակով։ Արգելքը կգործի մինչև ջերմոցային տնտեսությունների ստուգումների ավարտը և արդյունքների վերլուծությունը։