Կրեմլից նախազգուշացում․ հուսանք՝ Հայաստանը սթափ կդատի ու չի գա Ռուսաստանի հետ առճակատման․ Գալուզին

Ռուսաստանի Դաշնության արտաքին գործերի նախարարի տեղակալ Միխայիլ Գալուզինը հայտարարել է, որ Մոսկվան ակնկալում է հայաստանյան հասարակության զսպվածությունը նախընտրական փուլում։ ՌԴ Անվտանգության խորհրդի հատուկ աշխատանքային խմբի նիստից հետո լրագրողների հետ զրույցում դիվանագետն անդրադարձել է Հայաստանի ներկայիս ներքաղաքական մթնոլորտին։

Ըստ ռուս բարձրաստիճան պաշտոնյայի՝ Մոսկվան մշտապես հարգանքով է վերաբերվել հայ ժողովրդին։ Նա հույս է հայտնել, որ Հայաստանում սպասվող ընտրությունների շուրջ ստեղծված ակտիվ քաղաքական իրավիճակում քաղաքացիները թույլ չեն տա երկիրը ներքաշել Ռուսաստանի հետ հարաբերությունների բարդացման կամ առճակատման մեջ։

Գալուզինի ձևակերպմամբ՝ ռուսական կողմը կարևորում է հայաստանյան հանրության շրջանում իրավիճակի սթափ գնահատումը։ Ռուսաստանի արտաքին քաղաքական գերատեսչության ներկայացուցիչը շեշտել է երկկողմ հարաբերություններում լարվածության աճը բացառելու անհրաժեշտությունը, որը կարող է հրահրվել նախընտրական գործընթացների համատեքստում։