Հանրահայտ բրենդի հիմնադրի որդուն ձերբակալել են հոր սպանության կասկածանքով

Իսպանիայում ձերբակալվել է Mango ցանցի հիմնադրի որդին՝ Ջոնաթան Անդիկը։ Իրավապահ մարմինները նրան կասկածում են սեփական հոր՝ 71-ամյա միլիարդատեր Իսակ Անդիկի սպանությունը կազմակերպելու կամ իրականացնելու մեջ։

Ողբերգական դեպքը տեղի էր ունեցել 2024 թվականի դեկտեմբերին Բարսելոնայի մոտակայքում գտնվող Մոնսերատ լեռներում: Լեռնագնացության ընթացքում ավագ Անդիկը վայր էր ընկել 150 մետր բարձրությունից և մահացել։ Սկզբնական շրջանում քննությունը տեղի ունեցածը որակել էր որպես դժբախտ պատահար և նույնիսկ կարճել վարույթը, սակայն հետագայում ի հայտ եկած նոր հանգամանքները ստիպել են փոխել գործի ընթացքը։

Քննիչների ուշադրությունը գրավել են որդու տված ցուցմունքների և դեպքի վայրում հայտնաբերված փաստացի տվյալների միջև առկա անհամապատասխանությունները։ Մասնավորապես, պարզվել է, որ դեպքից մի քանի օր առաջ Ջոնաթան Անդիկն այցելել է լեռների հենց այն հատվածը, որտեղ հետագայում մահացել է հայրը։ Բացի այդ, իրավապահները տվյալներ են ձեռք բերել ընտանեկան տարաձայնությունների մասին. հայր և որդի հաճախ են վիճել ընկերության կառավարման հարցերի շուրջ։

Նշենք, որ Ջոնաթան Անդիկը հանդիսանում է Mango ընկերության տնօրենների խորհրդի անդամ և համարվում է ընտանեկան կարողության հիմնական ժառանգորդը։ Ընտանիքի ակտիվների ընդհանուր արժեքը գնահատվում է ավելի քան 4 միլիարդ եվրո։