Ֆրանսիայում Իլոն Մասկին ձերբակալելու օրդեր կտրվի

Փարիզի դատախազությունը հնարավոր է համարում X սոցիալական ցանցի հիմնադիր Իլոն Մասկի նկատմամբ կալանքի միջազգային օրդեր սահմանելը։

RTL ռադիոկայանի եթերում Փարիզի դատախազ Լոր Բեկոն հայտնել է, որ ընթացիկ քննության արդյունքում պաշտոնական մեղադրանքներ առաջադրվելու և ամերիկացի գործարարի՝ դատարան ներկայանալուց հրաժարվելու դեպքում, օրենքով սահմանված կարգով նրա նկատմամբ հետախուզում կհայտարարվի։ X հարթակի սեփականատիրոջ նկատմամբ խափանման միջոց կկիրառվի դատական ծանուցումներն անտեսելու պարագայում։

Տվյալ գործով նախաքննությունն այժմ վարում են երեք քննիչներ։ Իրավապահ մարմինների տեղեկացմամբ՝ ԱՄՆ արդարադատության նախարարությունը դեռևս պաշտոնական պատասխան չի ուղարկել ֆրանսիական կողմին, թեև այլ բնույթի գործերով երկու երկրների միջև փոխգործակցությունը շարունակվում է բնականոն հունով։ Մասկն ու ընկերության նախկին գլխավոր տնօրեն Լինդա Յակարինոն ապրիլի 20-ին հրավիրվել էին հարցաքննության, սակայն նրանց չներկայանալուց հետո դատախազությունը մայիսի 7-ին սկսել է նախնական քննություն։

Այս իրավական գործընթացը սկիզբ է առել 2025 թվականի հունվարին՝ հարթակի ալգորիթմների աշխատանքի դեմ ստացված բողոքների հիման վրա։ Քննության առարկա են դարձել նաև Grok չատբոտի կողմից Հոլոքոստի ժխտման տարածումը և արհեստական բանականությամբ ստեղծված սեքսուալ բնույթի պատկերները։ Ընթացիկ տարվա փետրվարին Եվրոպոլի և կիբերհանցագործությունների դեմ պայքարի ժանդարմերիայի մասնակցությամբ խուզարկություններ էին իրականացվել X-ի փարիզյան գրասենյակում։