ՆԱՏՕ-ի կործանիչները օդ են բարձրացվել․ լարված իրավիճակ՝ Լիտվիայում ԱԹՍ Է խոցվել

Լիտվայի Ուտենայի շրջանում՝ Սամանե գյուղի մոտակա դաշտում, ընկած անօդաչու թռչող սարք է հայտնաբերվել: Բելառուսի և Լատվիայի սահմանների մոտ տեղի ունեցած միջադեպի մասին հայտնել է Լիտվայի ազգային ռադիոն և հեռուստատեսությունը՝ հղում անելով Ճգնաժամային կառավարման ազգային կենտրոնին: Կառույցի ղեկավարի փոխանցմամբ՝ բեկորների նախնական զննումը թույլ է տալիս ենթադրել, որ այն ուկրաինական ռազմական ԱԹՍ է, սակայն սարքի արձակման կոնկրետ վայրն ու պայթուցիկի առկայությունը դեռևս ճշտվում են:

Հատկանշական է, որ Լիտվայի զինված ուժերի ռադարները  երկրի օդային տարածքում որևէ թռչող սարք չեն արձանագրել: Սա նմանատիպ առաջին դեպքը չէ. ընթացիկ տարվա մարտին մեկ այլ ուկրաինական ԱԹՍ էր ընկել Բելառուսին սահմանակից Վարենայի շրջանում, որը, պաշտոնական պարզաբանմամբ, շեղվել էր կուրսից և ցածր բարձրության պատճառով անտեսանելի մնացել հակաօդային պաշտպանության համակարգերի համար:

Նույն օրը սահմանային միջադեպեր են գրանցվել նաև հարևան երկրներում: Լատվիայի օդային տարածքում անհայտ ԱԹՍ-ի հայտնվելու պատճառով օդ են բարձրացվել ՆԱՏՕ-ի կործանիչները, թեև սարքը կարճ ժամանակ անց հեռացել է: Բացի այդ, Ֆինլանդիայի հարավում զինվորականներն ու ոստիկանությունը ականատեսի ահազանգով որոնողական աշխատանքներ են իրականացնել Ռուսաստանի հետ սահմանի մոտակայքում, սակայն արդյունքների մասին հավելյալ տեղեկություններ չեն հաղորդվում: