«Սա միայն սկիզբն է»․ Ռուսաստանը զգուշացնում է՝ Հայաստանը մեծ կորուստներ կունենա․ Վոլոդին

Հայաստանի ապրանքաշրջանառությունը Ռուսաստանի հետ 2025 թվականին նվազել է 45,4%-ով՝ երկրի՝ Եվրամիությանն անդամակցելու ձգտումների մասին խոսակցությունների ֆոնին, իսկ Եվրասիական տնտեսական միությունից (ԵԱՏՄ) դուրս գալը, ըստ փորձագետների գնահատականների, սպառնում է հայկական տնտեսությանը առնվազն 5 միլիարդ դոլարի կորստով, հայտարարել է ՌԴ Պետդումայի նախագահ Վյաչեսլավ Վոլոդինը։

«Փորձագետների գնահատականներով՝ ԵԱՏՄ-ից Հայաստանի դուրս գալը կարող է արժենալ երկրի ՀՆԱ-ի 15-20%-ի կորուստ՝ առնվազն 5 մլրդ դոլար... Հայաստանի՝ Եվրամիությանն անդամակցելու ձգտումների մասին խոսակցությունների ֆոնին մեր երկրի հետ ապրանքաշրջանառությունը 2025 թվականին կտրուկ նվազել է 45,4%-ով։ Եվ այս բացասական միտումը պահպանվում է»,- գրել է Վոլոդինը «Макс» հարթակի իր ալիքում։

Նա հիշեցրել է, որ Հայաստանը ԵԱՏՄ-ին միացել է 2015 թվականին, և անդամակցության տասը տարիների ընթացքում երկրի ՀՆԱ-ն աճել է 2,5 անգամ՝ 10,55-ից հասնելով 26,37 միլիարդ դոլարի։

«Բացի իրացման հսկայական շուկա մուտք գործելուց՝ Հայաստանը արտոնություններ է ստացել էներգետիկայի ոլորտում։ Մեր երկիրը Հայաստանին գազ է վաճառում 1000 խորանարդ մետրի դիմաց 177,5 դոլարով։ Այդ նույն ժամանակ Եվրոպայում գինը կազմում է 633 դոլար 1000 խորանարդ մետրի դիմաց։ Հայաստանի արտահանման 25%-ը բաժին է ընկնում Ռուսաստանին»,- նշել է Պետդումայի նախագահը։

Վոլոդինն ընդգծել է, որ Հայաստանում աշխատող և այնտեղ բիզնես կառուցող Ռուսաստանի քաղաքացիները սկսել են փակել իրենց ձեռնարկությունները։ Նրա խոսքով՝ նրանք հեռանում են՝ կապված ապագայի անորոշության ստեղծված իրավիճակի և հնարավոր առաջացող խնդիրների հետ։

«Սա միայն մակերեսային պատկերն է։ Կորուստներն ավելի շատ են լինելու։ Եվ դրանցից ամենևին ոչ բոլորն են առնչվում ֆինանսներին»,- հավելել է խորհրդարանականը։

Հայաստանի վարչապետ Նիկոլ Փաշինյանը բազմիցս հայտարարել է, որ երկիրը ցանկանում է դառնալ Եվրամիության անդամ, սակայն դրա համար անհրաժեշտ է համապատասխանել նրա չափանիշներին։ Ընդ որում, Ռուսաստանի նախագահ Վլադիմիր Պուտինը ապրիլի 1-ին Փաշինյանի հետ բանակցությունների ժամանակ նշել է, որ և՛ Եվրամիության, և՛ ԵԱՏՄ-ի հետ մաքսային միությունում գտնվելն ըստ սահմանման անհնար է, դա տնտեսական բնույթի հարց է։

Ավելի վաղ ՌԴ նախագահ Վլադիմիր Պուտինը հայտարարել էր, որ Երևանի համար ճիշտ կլիներ Հայաստանի քաղաքացիների և Ռուսաստանի՝ որպես Հանրապետության գլխավոր տնտեսական գործընկերոջ նկատմամբ հարգանքից ելնելով, հանրաքվե անցկացնել Եվրամիության հետ համագործակցության զարգացման վերաբերյալ։ Այդ դեպքում Ռուսաստանը կարող էր համապատասխան հետևություններ անել և գնալ «մեղմ, ինտելիգենտ և փոխշահավետ ապահարզանի» ճանապարհով։