Ռուսաստանի վաղվա օրը կախված է նրանից, թե ինչ կլսենք այսօր. Զելենսկի

Ուկրաինայի նախագահը հայտնել է ռազմաճակատում Ռուսաստանի կողմից հնչող նոր սպառնալիքների և դրանց տրվող համաչափ պատասխանների մասին։

Մայիսի 8-ին՝ Ուկրաինա լայնամասշտաբ ներխուժման 1535-րդ օրը, Վլադիմիր Զելենսկին հանդես է եկել ավանդական ուղերձով։ Նա նշել է, որ Ռուսաստանը շարունակում է նացիստականին նմանվող քաղաքականություն և վտանգ է ներկայացնում ոչ միայն Ուկրաինայի, այլև ողջ Եվրոպայի համար։ Նախագահի խոսքով՝ այսօրվա ռուս նացիստները փորձում են վերադարձնել Երկրորդ համաշխարհային պատերազմում պարտված կարգերը։ Նա ընդգծել է, որ ուկրաինացի հերոսները պաշտպանում են ժողովրդի ապրելու իրավունքը մի օկուպանտից, որն իր գործելաոճով նման է նախորդ դարի զավթիչներին։

Զելենսկին տեղեկացրել է, որ այցելել է Դնեպրոպետրովսկի մարզ, որտեղ շփվել է 31-րդ, 67-րդ մեխանիզացված բրիգադների և 20-րդ բանակային կորպուսի զինվորականների հետ։ Հանդիպումների ընթացքում քննարկվել է անօդաչու թռչող սարքերի քանակի և որակի ավելացման անհրաժեշտությունը։ Պետության ղեկավարը խոստացել է դիտարկել ֆինանսավորման ավելացման հնարավորությունը, որպեսզի ստորաբաժանումները կարողանան տեղում օպերատիվ լուծել իրենց խնդիրները։

Առաջիկայում նախատեսվում է Գերագույն գլխավոր հրամանատարի շտաբի նիստ, որտեղ կքննարկվեն մատակարարումների դեֆիցիտի և լոգիստիկայի հարցերը։ Զելենսկին կարևորել է նաև ռազմաճակատի մերձակա ճանապարհների վերանորոգումը, քանի որ դրանց որակից է կախված վիրավորների փրկության արագությունը։ Առանձնակի ուշադրություն է դարձվել Նիկոպոլի և Մարգանեցի պաշտպանությանը, ինչպես նաև Դոնեցկի մարզի առանցքային ուղղություններին։

Անդրադառնալով Ռուսաստանից հնչող նոր սպառնալիքներին՝ Ուկրաինայի նախագահը շեշտել է, որ երկիրը կգործի բացարձակ հայելային սկզբունքով։ Նա նշել է, որ թշնամու գնդակոծություններին և օդային հարվածներին արդեն եղել են համապատասխան պատասխաններ։ Ուղերձի ավարտին Զելենսկին հիշատակել է ԱՄՆ-ում Ռուստեմ Ումերովի ունեցած հանդիպումների և գերիների ազատմանն ուղղված հումանիտար ջանքերի կարևորության մասին։